MANILA, Philippines – Magbibigay ang Japan sa Pilipinas ng JPY30-bilyong loan, katumbas ng humigit-kumulang P11.5 bilyon, upang palakasin ang pagpapatupad ng Universal Health Care program ng bansa, ayon sa Department of Foreign Affairs (DFA) nitong Martes, Agosto 4.
Nilagdaan ni Foreign Affairs Secretary Ma. Theresa Lazaro ang diplomatic notes para sa Build Universal Health Care Program Subprogram 3-Emergency Support sa ilalim ng Philippine-Japan development cooperation framework.
“Today, I am pleased to sign the Diplomatic Notes in support of the Build Universal Health Care Program (Subprogram 3) under the Philippine-Japan development cooperation framework,” ani Lazaro.
“This reaffirms the strong commitment of the Philippines and Japan to ensuring quality, accessible, and equitable healthcare for every Filipino. To advancing our Philippine-Japan Comprehensive Strategic Partnership through shared dedication to building a stronger, healthier nation,” dagdag niya.
Gagamitin ang loan upang suportahan ang mga reporma sa sustainable healthcare financing at strategic purchasing, integrated delivery ng dekalidad na serbisyong pangkalusugan, at information management at performance accountability.
Ipapatupad at popondohan ang programa katuwang ang Japan International Cooperation Agency at Asian Development Bank.
Ayon sa DFA, inaasahang mapalalawak ng proyekto ang pantay na access sa dekalidad na serbisyong pangkalusugan, kabilang ang mga serbisyong tumutugon sa gender-specific health concerns at epekto ng climate change sa kalusugan.
Kasunod ang BUHC Subprogram 3 ng Subprogram 1, na ipinatupad mula Enero 2019 hanggang Mayo 2021 sa suporta ng ADB, at Subprogram 2, na ipinatupad mula Hulyo 2021 hanggang Setyembre 2023 sa tulong ng ADB, Asian Infrastructure Investment Bank, at JICA. RNT
