MANILA, Philippines – Nangako ang pamahalaan ng Japan nitong Sabado, Setyembre 13 na tutulong sa pagpapataas ng kamalayan ng mga botante sa Bangsamoro Autonomous Region in Muslim Mindanao (BARMM), mahigit isang buwan bago ang nakatakdang halalan.
Binigyang-diin ni Japanese Ambassador to the Philippines Endo Kazuya na matagal nang tumutulong ang Japan sa rehiyon sa pagbibigay-impormasyon at pagsusulong ng digitalization ng electoral process.
“As the region approaches its first election, we now invest in the voices of the people—their ability to shape the future,” ani Kazuya.
“But, before the votes are cast, voters need to understand the system, and only then can they discern and express their will and know the paths they would like to take.”
Kalahok ang Japan Embassy sa paglulunsad ng “Partnership for Informed Voting in BARMM,” na bahagi ng “The Project for Raising Voters’ Awareness and Promoting Digitalization of Electoral Process in Bangsamoro.”
Ito ang ikatlong bahagi ng P234-milyong grant ng Japan para sa nasabing proyekto, na ipinatutupad ng United Nations Development Programme (UNDP).
Kabilang sa voters’ education program na binuo sa ilalim nito ang multilingual radio program, digital kiosk, at voter education application na layong palawakin ang partisipasyon ng kababaihan, katutubo, at iba pang vulnerable groups sa halalan.
“This project will aim to provide clear and timely information in a voter-friendly manner, through the various languages spoken in the region,” dagdag ni Kazuya.
Ayon sa Commission on Elections, nananatiling payapa ang Bangsamoro region sa gitna ng 45-araw na campaign period para sa halalan sa Oktubre 13, at wala pang naitatalang election-related violence. RNT/JGC
