ZAMBOANGA CITY – Inaresto sa Pagadian City, Zamboanga del Sur ang isang 65-anyos na Jordanian national na iniuugnay sa mga suspek sa terrorist attack noong Disyembre 14, 2025 malapit sa Bondi Beach sa Sydney, Australia.
Kinilala ng 1st Infantry Division (1ID) ng Philippine Army ang suspek sa alyas na “Odeh,” na nadakip sa kanyang business establishment dahil sa paglabag sa Philippine Immigration Act of 1940.
“Odeh was arrested for violation of the Philippine Immigration Act of 1940, specifically overstaying and engaging in gainful business without the proper visa or permit,” ayon sa ulat ng 1ID.
Sinabi ng mga awtoridad na isinagawa ang operasyon matapos ang security review ng 1ID at Joint Task Force-Zampelan kasunod ng impormasyong natanggap mula sa partner security channels na nag-uugnay sa negosyo ni Odeh sa Pilipinas sa mga suspek sa pag-atake sa Sydney.
Tinarget sa naturang insidente ang “Chanukah by the Sea” celebration ng Jewish community at ikinlasipika ng mga awtoridad sa Australia bilang isang antisemitic terrorist incident.
“Based on this information, Philippine security agencies identified Odeh as a person of interest for further review, prompting coordination among concerned government agencies and the conduct of appropriate legal action related to his immigration status,” ayon sa 1ID.
Ayon sa records, mula 2014 hanggang 2025 ay madalas bumiyahe si Odeh sa Jordan, Saudi Arabia, Australia, Indonesia, United Arab Emirates, Qatar, at Malaysia. Nakakuha siya ng temporary residence visa noong 2023 na nag-expire noong Marso 2025.
Sa paunang imbestigasyon, wala pang natutukoy na direktang partisipasyon si Odeh sa naturang terrorist activity, ngunit magpapatuloy ang koordinasyon sa mga pambansa at internasyonal na ahensya upang masuri ang posibleng banta sa seguridad. Mary Anne Sapico
