MANILA, Philippines – Nanawagan ang mga mambabatas ng Makabayan bloc nitong Sabado, Pebrero 7 ng imbestigasyon sa hindi magandang pahayag ni Atty. Ferdinand Topacio.
Kasabay nito ay hinimok din nila ang istasyon ng radyo kung saan may programa si Topacio, na maging maingat sa nilalaman ng programa at mga salita laban sa mga kababaihan.
Kinondena nina Gabriela Rep. Sarah Elago, ACT Teachers Rep. Antonio Tinio at Kabataan Rep. Renee Co si Topacio sa kanyang “degrading attacks,” partikular kay Elago at aktres na si Jasmine Curtis-Smith, kapatid ni Anne Curtis, na naging topic din ng bastos na komento ni Quezon City Rep. Jesus “Bong” Suntay.
“In the first week of Women’s Month–a time meant to honor and uplift Filipino women–a time meant to honor and uplift Filipino women–Topacio chose instead to weaponize his radio platform to slut-shame, demean and intimidate women who dared to speak up,” saad sa joint statement ng tatlong mambabatas.
Nanawagan din sila sa Integrated Bar of the Philippines na imbestigahan si Topacio sa kanyang “conduct unbecoming of a lawyer,” at sa DWIZ at pamunuan nito na suriin ang mga content na inere sa programa ni Topacio.
Dagdag pa sa ipinanawagan nila ay ang pag-aksyon ng mga kasamahan sa House committee on women and gender equality kaugnay nito.
Ang tinutukoy ng mga mambabatas ay ang pinakahuling episode ng programa ni Topacio kung saan dinipensahan niya si Suntay.
Binweltahan ni Topacio sina Elago at Curtis-Smith sa pagsita kay Suntay at sinabing: “Lalaki ‘yan, ‘wag na tayong mag-plastikan, ang mga lalaki nagnanasa ‘yan talaga.”
Ibinunyag din ni Topacio na pinagnasahan niya si Elago nang representative pa ito ng Kabataan party-list.
Para naman kay Curtis-Smith, sinabi ni Topacio na:
“Ikaw, Jasmine, bakit ka nagpo-post ng mga bikini pictures mo? Hindi ba para ikaw ay pagnasahan?”
Para sa Makabayan bloc, sumisimbolo ng harassment at “abuse dressed up in a suit and a law degree” ang pahayag ni Topacio.
“Rather than address the substance of the criticism–that it is wrong to use a woman as a prop in an analogy to defend an accused murderer’s ally–Topacio went straight for the gutter,” sinabi ng mga mambabatas.
“This is victim-blaming. This is the logic of rape culture–that a woman’s appearance, choices and body are open invitations for objectification, and that she forfeits her right to dignity and to speak the moment she dares to be visible,” dagdag pa. RNT/JGC
