MANILA, Philippines – Inatasan ng Korte Suprema nitong Miyerkules ang House of Representatives at ang House committee on justice na magsumite ng komento sa mga petisyong naglalayong ipahinto ang impeachment proceedings laban kay Vice President Sara Duterte.
Sa pahayag ng SC, sinabi nitong pinagsama-sama nito ang mga petisyong inihain ni Duterte at ng ilang abogado, ngunit nilinaw na hindi ito nangangahulugang binigyan na agad ng due course ang mga kaso.
“The SC consolidated these cases and, without necessarily giving due course to the petitions, directed respondents to comment within a non-extendible period of 10 days from receipt of notice,” ayon sa korte.
Unang naghain ng petisyon noong Marso 27 sina lawyers Israelito Torreon, Vic Rodriguez, Rescie Angelli Rizada-Nolasco, Martin Delgra III, Wendel Avisado, James Patrick Bondoc, Raul Lambino, Luna Maria Acosta-Manlitoc, Jesus Hinlo Jr., at Dr. Richard Mata upang humiling ng temporary restraining order laban sa impeachment proceedings. Naghain naman si Duterte ng hiwalay na petisyon noong Marso 30.
Sa kanyang petition for certiorari, iginiit ni Duterte na labag sa Konstitusyon ang mga pagdinig ng House justice panel at wala itong kapangyarihang magsagawa ng paglilitis.
“It is evident that the proceedings before the respondent committee are, in truth and substance, a trial in disguise. Its members’ use of various nomenclatures such as a ‘mini-trial,’ a ‘hearing proper,’ or a ‘process akin to a preliminary investigation’ does not change its true nature,” nakasaad sa petisyon.
Binigyang-diin din ni Duterte na ang pagpapahintulot sa House justice committee na magsagawa ng paglilitis at fishing expedition ay “allow them to circumvent the limits of their function and usurp the prerogatives of the impeachment court solely vested in the Senate.”
Aniya, sa pagsasagawa ng “mini trial,” inaamin umano ng panel na mali ang nauna nitong pagtingin sa sapat na basehan ng mga reklamong inihain nina Saballa at Cabrera, o kaya’y nagsasagawa ito ngayon ng fishing expedition upang palakasin ang aniya’y “sorely inadequate” impeachment complaints.
Iginiit din ng Bise Presidente na walang due process at fair play sa proseso, at sinabi niyang hindi sapat ang simpleng abiso lamang dahil kinakailangan ang isang “genuine and meaningful opportunity to be heard.” Inulit din niya ang kanyang argumento na “no ultimate facts” ang nakasaad sa mga impeachment complaint at hindi dapat umasa lamang sa “legal conclusions or evidentiary facts.”
Hiniling din ni Duterte sa Korte Suprema na magpalabas ng pinal na injunction upang ipawalang-bisa ang impeachment proceedings kaugnay ng mga reklamong Saballa at Cabrera dahil umano sa pagiging unconstitutional ng mga ito, at mapigilan ang Kamara at Senado sa “doing any and all acts relative and pursuant thereto.”
Sa hiwalay na pahayag, sinabi ng kampo ni Duterte na ang kanilang petisyon ay hindi para iwasan ang proseso kundi upang humingi ng linaw sa mga usaping konstitusyonal. Samantala, sinabi ni Bicol Saro Rep. Terry Ridon, miyembro ng House justice panel, na ang petisyon ni Duterte ay “is anchored on a misrepresentation of facts and a distorted interpretation of the Constitution and prevailing jurisprudence.” (Jocelyn Tabangcura-Domenden)
