MANILA, Philippines – Sinabi ng Department of Social Welfare and Development (DSWD) na patuloy itong nag-oorganisa ng mga aktibidad sa adbokasiya upang makatulong na maiwasan ang pambu-bully sa mga pampublikong paaralan, ayon sa isang opisyal ng ahensya noong Miyerkules (Abril 23).
Nabatid kay Assistant Secretary Irene Dumlao na sinusuportahan ng ahensya ang anti-bullying campaign ng Department of Education (DepEd) sa pamamagitan ng pagsasagawa ng capacity-building at learning activities, lalo na para sa mga benepisyaryo ng Pantawid Pamilyang Pilipino Program (4Ps).
“Ang bullying ay isa sa mga pangunahing sanhi ng pagkagambala sa pag-aaral ng mga bata at kabataan. Upang makatulong na matugunan ang alalahaning ito, ang DSWD’s 4Ps ay nagsasagawa ng mga family development session (FDS) upang ipaalam sa mga magulang ang kahalagahan ng pagkakaroon ng isang mapag-aalaga na kapaligiran ng pamilya at paaralan para sa mga bata upang maiwasan ang pambu-bully,” sabi ni Dumlao, na siya ring tagapagsalita ng DSWD.
Kaugnay nito binigyang-diin ng tagapagsalita ng DSWD na ang mga sesyon ng FDS ay nakakatulong na palakasin ang kapasidad ng pagpapalaki ng mga magulang ng 4Ps upang turuan silang maging mas mapagmatyag sa emosyonal na kapakanan ng kanilang mga anak at upang linangin ang bukas na komunikasyon sa kanilang mga anak.
Bukod sa FDS sessions, binigyan diin ni Dumlao na ang DSWD Field Offices ay nagsasagawa rin ng mga aktibidad sa adbokasiya sa mga pampublikong paaralan upang maitaas ang kamalayan ng mga guro at mag-aaral sa iba’t ibang anyo ng bullying at prevention mechanisms.
Nabatid na isa sa mga kamakailang aktibidad laban sa bullying ng ahensya ay ginanap sa Barangay Nato, Sagñay sa Camarines Sur noong Abril 8. Ang mga kawani ng 4Ps ng DSWD Field Office 5-Bicol Region ay nagsagawa ng talakayan sa mga mag-aaral at guro sa high school upang matulungan silang matuto ng kanilang mga tungkulin upang maiwasan ang pambu-bully.
Samantala sinabi ni Dumlao na noong Nobyembre 2024, sa isang pambansang kongreso para sa mga batang benepisyaryo ng 4Ps, isa sa mga makabuluhang rekomendasyon sa patakaran na inaprubahan ay ang pag-amyenda sa Anti-Bullying Act of 2013.
Inilunsad noong 2008 at na-institutionalize ng Republic Act (RA) 11310 noong 2019, ang 4Ps ay ang national poverty reduction strategy at human capital investment program na nagbibigay ng conditional cash transfer sa mahihirap na sambahayan para sa maximum na panahon ng pitong taon upang mapabuti ang kalusugan, nutrisyon, at edukasyon ng kanilang mga anak. Santi Celario
