Kanayunan ng Mindanao suportado si Pacquiao

Mati City, Davao Oriental — Patuloy na lumalakas ang kampanya ni Senator Manny Pacquiao sa ilalim ng “Alyansa Para sa Bagong Pilipinas” sa Mindanao, dahil sa kanyang pagtutok sa kaunlaran ng mga kanayunan.

Sa Mati City, inilahad ni Pacquiao ang mga plano tulad ng libreng pabahay para sa mahihirap, kampanya laban sa korupsiyon, at pagsuporta sa kabuhayan. “Kung gusto natin ng tunay na pagbabago, kailangan simulan natin sa mga malalayong lugar — sa mga hindi naririnig at nakikita,” aniya.

Nakipagpulong din siya sa mga lider tulad ni Davao del Norte Governor Edwin Jubahib sa Tagum City upang talakayin ang pagpapaunlad ng rehiyon. Kabilang sa kanyang plataporma ang pagpapalakas ng kabataan sa pamamagitan ng sports, pagpapabuti ng farm-to-market roads, at paglawak ng serbisyong pangkalusugan at edukasyon.

Muling binigyang-diin ni Pacquiao, na nagmula rin sa mahirap na pamilya sa General Santos City, na, “Ang pag-angat ng kanayunan ay pag-angat ng buong bansa.” Si Pacquiao ay nakikitang malakas na kandidato sa darating na halalan, lalo na sa Visayas at Mindanao. RNT