ANTIQUE, Philippines – Arestado ang isang punong barangay na itinuturing na high-value individual (HVI) matapos ang buy-bust operation sa Barangay Maragubdub, San Remigio, Antique nitong Biyernes ng hapon, Mayo 29.
Nakilala ang suspek sa alyas na “Alvin,” 38 taong gulang.
Batay sa imbestigasyon ng pulisya, ang suspek ay dating drug surrenderee at halos isang buwan nang minamanmanan bago siya maaresto.
Isinagawa ang operasyon ng pinagsanib na pwersa ng Philippine National Police Drug Enforcement Group – Special Operations Unit 6, Antique Police Provincial Office, Provincial Drug Enforcement Unit, Provincial Intelligence Unit, Regional Intelligence Unit 6, at San Remigio Municipal Police Station.
Nasamsam sa operasyon ang tatlong plastic sachet at isang knot-tied plastic pack na naglalaman ng hinihinalang shabu na may bigat na humigit-kumulang 115 gramo, na tinatayang nagkakahalaga ng ₱782,000. Nakuha rin ang buy-bust money at iba pang ebidensiya.
Kasalukuyang nasa kustodiya ng pulisya ang suspek at haharap sa kaso dahil sa paglabag sa Comprehensive Dangerous Drugs Act of 2002.
“This operation sends a clear message that no one is above the law. Regardless of position or status in the community, those who engage in illegal drug activities will be held accountable,” ayon kay Police Brigadier General Randulf T. Tuaño, Acting Regional Director ng Police Regional Office 6.
Pinuri rin niya ang mga operatiba at muling iginiit ang kampanya laban sa ilegal na droga sa rehiyon. RNT/MND
