Karagdagang court branches sa Pinas aprub kay PBBM

MANILA, Philippines- Nilagdaan ni Pangulong Ferdinand “Bongbong” Marcos Jr. bilang batas ang 11 panukalang lumilikha ng karagdagang court branches sa Pilipinas. Dahil dito, may kabuuang 44 bagong court branches ang itatatag.

Sa bisa ng 11 Republic Acts na ipinalabas ng Malacañang nitong Linggo, ipinag-utos ni Marcos ang paglikha ng sumusunod na court branches:

• 12 karagdagang branches ng Regional Trial Court sa Fourth Judicial Region sa Los Baños, Cabuyao, Laguna

• Isang branch ng Municipal Trial Court sa Cabuyao, Laguna

• Dalawang karagdagang branches ng Regional Trial Court at dalawang karagdagang branches ng Municipal Trial Court sa mga lungsod ng Pagadian, Zamboanga Del Sur

• 10 karagdagang branches ng Regional Trial Court at walong karagdagang branches Municipal Trial Court sa Antipolo, Rizal

• Dalawang karagdagang branches ng Regional Trial Court sa Samal, Panabo, Davao del Norte

• Apat na karagdagang branches ng Regional Trial Court at apat na karagdagang branches ng Municipal Trial Court sa Ormoc, Leyte

• Dalawang karagdagang branches ng Regional Trial Court sa Tubod, Lanao Del Norte

• Isang karagdagang branch ng Municipal Trial Court sa Malaybalay, Bukidnon

• Dalawang karagdagang branches ng Municipal Trial Court sa Bacolod, Negros Occidental

• Tatlong karagdagang branches ng Regional Trial Court at dalawang karagdanag branches ng Metropolitan Trial Court in Navotas

• Tatlong karagdagang branches ng Municipal Trial Court sa San Carlos, Pangasinan

• Dalawang karagdagang branches ng Regional Trial Court sa Gingoog, Misamis Oriental

Samantala, sa dalawa pang nilagdaang batas, inaprubahan ni Marcos ang pag-upgrade sa Basilan General Hospital sa Isabela, Basilan bilang Level III hospital na kikilalanin bilang Basilan Medical Center; at pagtatatag ng isang Multi-species Marine Hatchery sa Tabina, Zamboanga del Sur. RNT/SA