MANILA, Philippines – Nagtaas ng alarma ang National Capital Region Police Office (NCRPO) dahil sa pagdami ng suicide at self-harm incidents sa Metro Manila, mula 33 kaso noong parehong panahon noong 2025, sa 111 kaso mula Enero 1 hanggang Marso 23, 2026.
Ayon sa NCRPO, kadalasan ang sanhi ay emotional distress, problema sa relasyon, pinansyal na pressure, o personal na pagkawala. Binanggit din nila ang epekto ng labis na oras sa online platforms at gaming, na maaaring magpalala ng emosyonal na kahinaan.
Pinapalakas ng NCRPO ang real-time at community-based interventions sa pakikipagtulungan sa barangay, paaralan, at iba pang lokal na grupo upang maagapan ang mga senyales ng panganib. Pinapayuhan ang publiko na maging alerto sa pagbabago ng ugali, withdrawal sa social interactions, at shift sa online activity.
Ipinapaalala rin na bukas ang 911 hotline para sa mga emergency. Ayon kay NCRPO Chief Police Major General Anthony Aberin, mahalaga ang gabay ng pamilya, paaralan, at komunidad upang maagapan at mailigtas ang buhay. RNT/MND
