NAKARATING na sa Nansha district, Guangzhou, China ang kauna-unahang pag-export ng frozen durian meat at paste na pinayagan ng General Administration of Customs ng People’s Republic of China noong Pebrero 18, 2025.
Gumawa ang Maylong Enterprises Corporation, isang kompanyang nakabase sa Davao City ng kasaysayan bilang unang negosyo sa Pilipinas na inaprubahang magsimula ng pagdadala ng durian sa nasabing bansa.
Ipinadala ng kompanya ang 1,050 kahon ng frozen durian meat at 300 kahon ng durian paste na nagkakahalaga ng Php 8.2 million nitong Pebrero 11, 2025 ay.
Isa itong mahalagang tagumpay sa sektor ng agrikultura sa bansa. Pinagtulung-tulungan ito ng Department of Agriculture-Regional Field Office XI, Bureau of Plant Industry – Plant Quarantine Service, Port of Davao, at ng mga durian producers sa rehiyon. Tiniyak ng mga ito ang masusing pagsunod sa mahigpit na regulasyon ng China pagdating sa pag-aangkat ng produkto.
Binigyang-diin ni DA-RFO XI regional executive director Macario Gonzaga ang frozen durian ay sumasalamin sa pag-asa at pangarap ng mga magsasaka sa Davao region, at nagpapakitang ang tagumpay ay nakakamit sa pamamagitan ng iisang pananaw at layunin.
Sumusuporta naman ang Durian Industry Association of Davao City at ang Durian Exporters Association of the Philippines sa pagbubukas ng merkado sa China. Kapwa binigyang-diin ng dalawang organisasyon ang kahalagahan ng pagpapanatili ng kalidad ng mga ipapadalang frozen durian at paste upang mapangalagaan ang reputasyon ng durian mula sa Pilipinas sa pandaigdigang merkado.
Papatunayan ng bansa sa China na ang Pilipinas ang nangunguna bilang tagagawa ng durian sa buong mundo.
Sa datos ng World Trade Organization, ang China ang ikatlong pinakamalaking bansang kumokonsumo ng fresh durian sa buong mundo na noong 2022 ay umabot sa 824,000 tonelada ang inangkat na nagkakahalaga ng US$ 4 billion.
Umaabot naman sa mahigit 70,000 tonelada ng durian ang naaani ng Pilipinas na karamihan ay mula sa Davao region.
