QUEZON, Philippines – Arestado ang isang lalaki dahil sa umano’y pagpapanggap na pulis at pangingikil ng pera sa isang biktima kapalit umano ng tulong sa pagsasampa ng kaso sa Lucena, Quezon.
Batay sa ulat ng Criminal Investigation and Detection Group (CIDG), nag-ugat ang operasyon sa reklamong inihain ng isang babaeng biktima na nagpakilala ang suspek bilang miyembro ng CIDG Quezon Provincial Field Unit (PFU).
Sinabi ng suspek sa biktima na maaari niyang pangasiwaan ang pagsasampa ng kanyang reklamo at garantiyahan ang paghatol kapalit ng P5,000.
Gayunpaman, ang paulit-ulit na paghingi ng pera ng suspek ay nagdulot ng hinala ng biktima.
Kalaunan ay nag-verify siya sa CIDG Quezon PFU at natuklasan na ang lalaki ay hindi konektado sa Philippine National Police (PNP) at hindi rin nakatalaga sa CIDG.
Ito ang nagtulak sa CIDG na maglunsad ng entrapment operation, na humantong sa pagkakaaresto sa suspek dahil sa umano’y paglabag sa Article 294 (Robbery/Extortion) at Article 177 (Usurpation of Authority o Official Functions) ng Revised Penal Code.
Narekober mula sa suspek ang ilang pekeng CIDG identification card na pinaniniwalaang ginamit sa mga katulad na pamamaraan.
“The CIDG assists all the complainants and victims without payment or monetary consideration,” ayon kay CIDG acting director Police Major General Robert Morico II.
“We urge the public to transact business or complaints to organic personnel of the Unit, and to report immediately any suspicious or illegal activities just like the modus operandi of the suspect,” dagdag niya. RNT/MND
