MANILA, Philippines – Arestado ng mga tauhan ng District Special Operations Unit ng Southern Police District (DSOU-SPD) ang mataas na opisyal ng isang Communist Terrorist Group (CTG) na tinaguriang No. 8 Top Ten Most Wanted Person (TTMWP) sa Provincial Level ng Northern Samar sa isang bus terminal sa Pasay City Biyernes ng gabi, Abril 17.
Kinilala ni SPD acting District Director P/Col. Glenn Oliver Cinco ang nadakip na suspek na si alyas Belho o Yani, 29, miyembro ng Sub-Regional Guerrilla Unit (SRGU), Eastern Visayas Regional Party Committee (EVRPC).
Si alyas Belho ay iniulat na sangkot sa opensibang tactical laban sa mga tropa ng gobyerno kabilang na ang 2018 ambush na naganap sa Las Navas.
Sinabi ni Cinco, ang isinagawang operasyon laban sa suspek ay pinamunuan ng DSOU sa pakikipagtulungan ng District Intelligence Division (DID-SPD), DMFB-SPD, gayundin ng mga provincial units mula sa Northern Samar Police Provincial Office.
Ayon kay matagumpay ang pagsasagawa ng operasyon laban sa suspek sa bisa ng isinilbing warrant of arrest sa kasong attempted murder na inisyu noong Hunyo 30, 2021 ni Hon. Ricardo Estavillo Amos, Presiding Judge of the Regional Trial Court Branch 22, Laoang, Northern Samar, na may kaakibat na rekomendasyon na piyansa sa halagang P100,000.
Base sa nakalap na rekord, sinabi ni Cinco na si alyas Belho naging dating kabahagi ng Special Partisan Unit (SPARU) na sangkot sa pagpatay ng ilang CAFGU personnel sa Northern Samar.
Ang pagkakadakip sa suspek ay itinuturing na isang malaking bagay sa larangan ng seguridad ng bansa kung saan ang nabanggit na indibidwal ay may kaugnayan sa organizational structure ng CTG.
Kasalukuyang nakapiit sa custodial facility ng DSOU ang suspek habang inihahanda ang dokumentasyon para sa paglipat ng kustodiya nito sa Northern Samar Police Provincial Office.
“The arrest of these individuals is a clear message that the Southern Police District will never falter in its pursuit of justice. This successful interdiction highlights our relentless campaign to dismantle networks of criminality and ensure that those who violate our laws are held answerable for their actions. By accounting for high-value fugitives with ties to insurgent groups, we continue to uphold our commitment to national peace and security,” ani Cinco. James I. Catapusan
