BULACAN, Philippines – Ilang estudyante, church groups, at mga residenteng naninirahan sa kahabaan ng Manila Bay shoreline ang nagsagawa ng kilos protesta sa Malolos, Bulacan.
Ang kilos protesta ay para tuligsain ang umano’y maanomalyang flood control projects sa lalawigan.
Ito ay matapos ihayag ni House Infra Committee Co-Chair Terry Ridon na ang P96 million “ghost” flood control project sa Barangay Sipat, Plaridel ay isang “insertion” ng bicameral conference committee.
Nilabanan ng mga nagpoprotesta ang ulan habang nagpapakalat ng mga fliers laban sa ilang lokal at pambansang opisyal na sinasabi nilang sangkot sa isyu.
Sinabi nila na hindi lamang dapat hanapin ang pananagutan sa Department of the Public Works and Highways (DPWH), ngunit dapat ding umabot sa mga lokal at pambansang opisyal na may kamay sa mga imprastraktura sa flood control at pambansang pagbabadyet.
Sinabi ni Anakbayan Central Luzon chairwoman Thea Trinidad na “valid” na magalit sa mga maanomalyang flood control projects, at sinabing ang budget na ninakaw ng mga umano’y maling opisyal, tauhan ng DPWH, at mga kontratista ay maaaring ginamit para sa mga pampublikong serbisyo.
“Makatwiran ang nagiging pambansang pagkilos laban sa mga korap na pulitiko at kontraktor dahil ang pondong ninakaw nila ay pondo sana para sa edukasyon, pampublikong serbisyo, siyensya, lokal na produksyon at agrikultura,” aniya, dinagdag na marami na ang pagod sa “slow” justice system ng bansa.
Nandoon din ang mga kinatawan mula sa Promotion of Church People’s Response (PCPR), Bulacan State University (BulSU) Student Government, at Anakbayan BulSU.
Ang mga katulad na kilos-protesta ay isinagawa sa Pasig City, Manila, at mga lugar sa Central Luzon mula nang malantad ang mga “ghost” flood control projects, na nag-udyok sa mga pagsisiyasat ng Senado at House of Representatives. RNT/MND
