MANILA, Philippines – Inatasan ng Muntinlupa Regional Trial Court Branch 205 ang lahat ng partido sa cyber libel case na inihain ni Vic Sotto laban kay filmmaker Darryl Yap na huwag isiwalat o pag-usapan ang case proceedings at iba pang may kaugnayan sa isyu matapos nitong payagan ang urgent motion ni Yap para sa paglalabas ng gag order na inihain noong Enero 10.
“The Petitioner and any person acting for and on behalf of the petitioner are enjoined from publicly disclosing or discussing the contents of the verified return to be submitted by the respondents in this case, as well as any matters learned from the proceedings of this case,” saad sa Omnibus Order na inilabas nitong Lunes, Enero 13.
“All parties are directed to observe strict confidentiality in compliance with the sub judice rule, ensuring that the case proceedings and any related matters remain undisclosed to the public until resolved,” dagdag pa.
Ayon sa abogado ni Yap na si Atty. Raymond Fortun, naghain sila ng mosyon para pigilan ang kampo ni Sotto na maglabas ng iresponsableng pahayag at maiwasan ang paglalabas ng anumang detalye ng pelikula dahil hindi pa ito nailalabas.
Nakitaan ng korte ng merit ang argumento na ang paglalabas ng impormasyon ay makakaapekto sa resulta ng pelikula.
“The lawyers’s statements may cause to misrepresent the court’s orders and could prejudice public perception. Ultimately, the court’s priority would be to protect the fair administration of justice and prevent undue influence on the judicial processes,” saad pa sa kautusan.
Sinampahan ni Sotto si Yap ng 19 counts ng cyber libel matapos na mabanggit ang pangalan nito sa teaser ng pelikulang “The Rapists of Pepsi Paloma”.
Sa Omnibus Order na inilabas nitong Lunes, inatasan ni Presiding Judge Liezel Aquiatan si Sotto na magkomento sa loob ng tatlong araw sa motion for consolidation na inihain ni Fortun.
Layon ng motion for consolidation na pagsamahin ang petition para sa writ of habeas data ni Sotto kasama ang kanyang criminal complaint ayon sa mandato ng Supreme Court Circular 08-1-16-SC.
Nilinaw ng korte na hindi pa nito ipinag-utos ang pag-aalis ng mga materyales na may kaugnayan sa pelikula.
“The petitioner mistakenly believed that the issuance of the writ already constituted the granting of the relief sought in their petition for a writ of habeas data.”
“This court emphasizes that the issuance of the writ merely serves as a procedural directive requiring the respondents to submit a verified return. The actual relief prayed for in the petition will only be considered and resolved after the court conducts a proper hearing to assess the merits of the case,” pagtatapos ng kautusan.
Samantala, inilipat ang pagdinig na dapat sana ay sa Enero 15 ay ginawang Enero 17. RNT/JGC
