Bulacan – Patay ang isang 25 anyos na dalagang motorcycle rider matapos aksidenteng masagasaan ng truck sa bayan ng Pulilan.
Kinilala ng pulisya ang kalunos-lunos na biktimang si Savierlene Cruz, PNP NUP, residente ng Brgy. Calumpang.
Sa report ng Pulilan police naganap ang insidente bandang 7:40 ng gabi nitong September 25 sa kahabaan ng Pulilan/Calumpit Regional road, Brgy. Dampol 2nd B
Ayon sa report, isang tawag sa telepono ang kanilang natanggap mula sa Brgy. Dampol 2nd B tungkol sa vehicular accident kaya agad silang rumesponde sa lugar.
Base sa imbestigasyon at nakalap na CCTV footage, kapwa binabagtas ang pakanlurang kalsada nang subukang unahan ng biktimang lulan ng white/black Honda Click ang white Isuzu Forward sa kanang bahagi nito subalit nawalan ito ng kontrol.
Dahil dito, nabatid na nag-slide ang biktimang rider kaya tumama sa right rear tire ng truck hanggang sa pumailalim at tuluyang masagasaan.
Nang makarating ang rescue team ay agad dinala ang biktimang nagtamo ng maraming sugat sa ibat-ibang parte ng katawan sa kalapit na ospital para sa paunang lunas subalit patay na ito.
Nahaharap sa kaukulang kaso ang driver na nakilalang si Joseph Aguilar habang nasa kostudiya ng naturang istasyon ng pulisya
Kaugnay nito, nakikiramay ang buong puwersa ng Bulacan police sa pagpanaw ng kanilang kasamahan na nagbigay dedikasyon sa organisasyon at serbisyo sa komunidad. (Dick Mirasol III)
