MANILA, Philippines – Mariing kinondena ng Department of Education ang umano’y online threat na atakihin ang Leyte National High School sa Tacloban City, dahilan upang higpitan ang seguridad sa pinakamalaking secondary school sa Eastern Visayas.
Sinabi ni DepEd Tacloban Schools Division Superintendent Sherlita Palma nitong Martes na iresponsable at labag sa batas ang ganitong mga banta at sinisira nito ang ligtas na kapaligiran sa pag-aaral na nararapat para sa mga estudyante at education workers.
“Threats against schools, whether made in person or through digital platforms, are treated with utmost seriousness and are immediately subjected to established security and legal protocols,” ani Palma.
Nakatanggap ang mga opisyal ng paaralan noong Lunes ng gabi ng online message na naglalaman ng umano’y banta ng pamamaril laban sa campus, na may halos 9,000 estudyante.
Agad iniulat ni LNHS Principal Bayani Adona ang insidente sa Philippine National Police para sa kaukulang aksiyon. Isinangguni rin ang kaso sa Regional Anti-Cybercrime Unit upang matukoy ang mga nasa likod ng banta.
Hindi sinuspinde ang face-to-face classes noong Martes matapos makipag-ugnayan ang mga opisyal ng paaralan sa PNP at iba pang kinauukulang awtoridad.
“Sufficient measures have been put in place to ensure the safety and protection of our learners, teachers, and school personnel. Immediately following the report, a strong police presence, including uniformed police officers and members of the Special Weapons and Tactics team, was deployed to secure the school premises and maintain peace and order,” dagdag ni Palma.
Tiniyak ng DepEd sa mga estudyante, magulang, school personnel at publiko na kontrolado ang sitwasyon at patuloy itong mahigpit na minomonitor ng mga awtoridad.
Lumitaw ang banta halos isang buwan matapos ang pamamaril sa San Jose National High School sa Tacloban City na ikinasawi ng tatlong estudyante at ikinasugat ng 20 iba pa. Santi Celario
