Bulacan – Patay ang isang 60-anyos na lalaking PWD matapos pagpapaluin ng tubo sa ulo ng kapitbahay na suspek sa bayan ng San Miguel.
Kinilala ang biktimang si Eduardo Bonina, residente ng Brgy. Labne habang ang kapitbahay na suspek ay hindi muna pinangalanan.
Sa report ng San Miguel police kay Bulacan Police director PCOL. Rely Arnedo, nangyari ang karumal-dumal na krimen bandang alas-9:30 ng gabi nitong Mayo 30 sa naturang lugar.
Ayon sa inisyal na imbestigasyon, habang nasa loob ng bahay ang biktima ay pinasok ng suspek at walang kaabog-abog na pinaghahampas sa ulo.
Sinasabing binalikan pa ng suspek ang biktima at muling pinaghahampas sa ulo para tiyaking patay na ito hanggang sa tumakas, ayon na rin sa saksi.
Tinutugis na ng pulisya ang kapitbahay na suspek na nahaharap sa kasong murder. Dick Mirasol III
