MANILA, Philippines – Pinasinayaan kamakailan ng Pamahalaang Lungsod ng Caloocan ang Caloocan Calm Space, isang inisyatiba na naglalayong magbigay ng libre at accessible na mga aktibidad sa pagpapahinga at pag-iisip upang itaguyod ang mas mahusay na mental health awareness sa mga nasasakupan ng lungsod.
Para sa mga opening session nito sa 5th Floor ng Caloocan City Hall -South, nag-aalok ang Calm Space ng mga Yoga class at Sound Healing na aktibidad. Kasama rin sa mga sesyon sa hinaharap ang isang in-house na mental health coach upang magbigay ng agarang pagpapayo at suporta sa kalusugan ng isip.
Patuloy na kinikilala ni City Mayor Dale Gonzalo “Along” Malapitan na lumalaki pa rin ang pag-aalala sa kalusugang pangkaisipan, lalo na sa mga kabataan at estudyanteng nakakaranas ng pagkabalisa, depresyon, at pagka-burnout.
Binigyang-diin ng lokal na punong ehekutibo na ang pagbibigay-priyoridad sa mga programang pangkalusugan ay kinakailangang kasama ang kalusugan ng isip at patuloy na susuportahan ng kanyang administrasyon ang adbokasiya na ito.
“Sa pagbisita natin sa mga komunidad at sa mga eskwelahan, nakita po natin na malaking issue pa rin sa mga kabataan ang pagkakaroon ng mental health concerns kaya naman po naging bahagi ng mga programang pangkalusugan natin ang pagtitiyak na maayos ang kalagayang pangkaisipan ng lahat,” ani Mayor Along.
“Patuloy nating sisikapin na tugunan ang mga pangangailangan ng ating mga kababayan, hindi lamang sa pisikal na aspeto, kundi pati na rin ang kanilang kapakanan. Remember, if you need to pause, you have Caloocan Calm Space to help you heal and recover,” dagdag niya. (Merly Duero)
