MANILA, Philippines – Inihayag ni Batangas Rep. Gerville Luistro, chairman ng House Committee on Justice, na pumapasok na sa tinawag niyang “territory of forensic truth” ang impeachment proceedings laban kay Vice President Sara Duterte, kung saan mas bibigyang-tuon na ang mga dokumento at financial records kaysa sa oral testimonies.
Ayon kay Luistro, ang pagdinig ngayong araw ay hudyat ng paglipat mula sa witness-based testimony patungo sa pagsusuri ng mga ebidensiyang nakabatay sa records tulad ng Statement of Assets, Liabilities and Net Worth (SALN), Bureau of Internal Revenue (BIR) documents, at Anti-Money Laundering Council (AMLC) reports.
“Today, we expect further evidence, from the Office of the Ombudsman, from the BIR, from the SEC, and especially from the AMLC,” pahayag ni Luistro sa kanyang opening statement.
“We also anticipate testimonies that will help contextualize the data before us, including from former Senator Antonio Trillanes,” dagdag pa nito.
Binigyang-diin ng mambabatas na ang kasalukuyang yugto ay nakasentro sa pagsusuri ng mga numerong mas mahirap umano manipulahin o baluktutin kumpara sa mga pahayag ng mga testigo.
“Kung mapapansin ninyo, ang pag-uusapan natin ngayon ay mga numero, SALN, tax records from the BIR, and reports from the AMLC. This is the part where the numbers have to be studied, compared, and analyzed,” ani Luistro.
Idinagdag niya na ang mga datos na ito ay hindi gaya ng opinyon o naratibo na maaaring magbago depende sa interpretasyon.
“And numbers, unlike people, do not have motives. Numbers do not lie,” diin pa nito,
Ipinaliwanag din ni Luistro na ang imbestigasyon ay tumatalakay sa public funds na dapat ay maayos na naiuulat at nagagamit.
“At higit sa lahat, hindi po ito basta numero lamang, pera ito ng taumbayan. Pera ito ng manggagawang Pilipino na araw-araw kumakayod, ng pamilyang nagtitipid para makabayad ng buwis, ng bawat Pilipinong umaasa na ang kanilang ambag ay napupunta sa tama,” aniya.
Dagdag pa nito, ang mga financial records ay magpapakita ng mas malinaw na larawan ng mga posibleng discrepancy sa mga datos.
“At kapag pinagsama-sama ang mga numerong ito, mula sa SALN, sa BIR, at sa AMLC, they begin to tell a story no press conference can rewrite, no diversion can erase,” ani Luistro.
Sinabi pa nito na kung patuloy na hindi haharap at magsasalita si Duterte ay ang mga dokumento ang magsisilbing ebidensya.
“Kung ayaw magsalita ng tao, kung ayaw humarap ng Bise Presidente, hayaan natin na ang mga numero ang magkwento,” giit pa nito.
Tiniyak din ni Luistro na susundan ng komite ang lahat ng ebidensya saan man ito humantong, at hindi maaapektuhan ng ingay sa labas ng pagdinig.
“At ang direksyon natin ngayon ay simple, ngunit matibay: we follow the evidence, wherever it leads. Hindi tayo magpapadala sa ingay. Hindi tayo lilihis sa proseso. Let the evidence speak. Let the numbers testify. Let the chips fall where they may,” pagtatapos pa nito. Gail Mendoza
