MANILA, Philippines – Ipinaliwanag ng Philippine Atmospheric, Geophysical and Astronomical Services Administration (PAGASA) na ang total lunar eclipse ay nagaganap kapag pumagitna ang mundo sa pagitan ng araw at buwan at walang dapat ikabahala sa mapulang kulay ng buwan tuwing nagaganap ito, sa kabila ng matagal nang paniniwala at pamahiin tungkol dito.
Ang pulang kulay o “blood moon” ay dulot ng sinag ng araw na dumaraan sa atmospera ng mundo. Aniya, ligtas itong panoorin kahit walang espesyal na kagamitan.
Makikita sa buong bansa, kung papayag ang panahon, ang total lunar eclipse sa Marso 3. Tatagal ang total phase ng humigit-kumulang 59 minuto.
Magsisimula ang totality alas-7:04 ng gabi at aabot sa pinakamataas na yugto alas-7:34 ng gabi, kung saan tuluyang matatakpan ng anino ng mundo ang buwan. Magtatapos ang totality alas-8:03 ng gabi.
Hindi kailangan ng espesyal na kagamitan sa panonood, ngunit maaaring gumamit ng binoculars para mas malinaw ang tanawin.
Ayon pa sa PAGASA, may dalawang lunar at dalawang solar eclipse ngayong taon, ngunit ang lunar eclipse lamang sa Marso 3 ang makikita sa Pilipinas.
Ang huling total lunar eclipse na nakita sa bansa ay noong Setyembre 7–8, 2025, at ang susunod ay sa Disyembre 31, 2028 hanggang Enero 1, 2029, na sasabay sa bisperas ng Bagong Taon.
Iminungkahi rin ng ahensya ang iba pang mahahalagang petsa para sa mga mahilig sa astronomiya: ang bihirang six-planet parade sa Pebrero 28, full blue moon sa Mayo 31, at supermoon sa Disyembre 24. RNT/MND
