LUNGSOD NG TAYABAS, Quezon – Arestado noong Martes ng gabi, Agosto 6, ang mag-asawang isinasangkot sa pagpatay sa isang Pinay at kanyang Japanese na anak na babae sa Sunrise Village, Barangay Baguio, nitong lungsod.
Kinilala ng pulisya ang mga suspek na sina Ligaya, 54, at asawa nitong si Charlie.
Nahuli ang mga suspek sa warrant of arrest para sa pagpatay na may petsang Agosto 5, 2024, na inisyu ni Judge Julieto Fabon Fabrero, presiding judge, Regional Trial Court Branch 168, Lucena City.
Walang piyansang inirekomenda para sa kanilang pansamantalang kalayaan.
Pinatay umano ng mga suspek ang Japanese na si Mai Motegi, 26, at ang kanyang ina na si Lorry Litada, 54, Filipino, noong Pebrero 21, 2024.
Tinamaan ang mga biktima ng mapurol na instrumento sa ulo at sinaksak sa dibdib. Inilibing sila sa likod-bahay ng kanilang bahay sa isang subdivision sa Barangay Isabang, Tayabas City.
Nahukay ng pulisya ang mga bangkay ng mga biktima noong Marso 14 sa paghahanap sa likod-bahay ng mga suspek.
Mag-asawa sina Ligaya at Charlie at kapatid ni Ligaya si Lorry.
Nakakulong ang mga suspek sa Tayabas City police station. RNT
