Magkahiwalay na sunog, tumupok ng maraming sasakyan, kabahayan sa Rizal

RIZAL, Philippines – Dalawang hiwalay na sunog ang nangyari noong Linggo, Marso 15 sa lalawigan ng Rizal.

Sa Antipolo City, sumiklab ang sunog sa isang garage sa Barangay Mayamot bandang 1:08 p.m., na agad na naapula bandang 1:34 p.m.

Natupok nito ang pitong sasakyan, kabilang ang limang bus at dalawang taxi, na ilan ay nakatakdang bumiyahe papuntang Bicol.

Wala namang naiulat na nasaktan.

Samantala sa Cainta, tinupok ng apoy ang humigit-kumulang 40 bahay sa boundary ng Filinvest Eastville sa Antipolo at Barangay San Isidro.

Ayon kay Mayor Keith Nieto, gawa sa light materials ang mga nasirang bahay.

Nagsimula ang sunog bandang 3:28 p.m., umabot sa second alarm 3:55 p.m., at nakontrol bandang 4:35 p.m.

Inatasan agad ang Municipal Assistance Team para tulungan ang mga apektadong pamilya. RNT/MND