Magna Carta ng Barangay Health Workers suportado sa Senado

MANILA, Philippines — Suportado sa Senado ang Senate Bill No. 1905 o ang panukalang Magna Carta of Barangay Health Workers (BHWs), na naglalayong palakasin ang pagkilala, benepisyo at proteksyon para sa mga barangay health worker.

Sa kanyang co-sponsorship speech, sinabi ng isang senador na matagal nang nagsisilbing gulugod ng primary healthcare ang mga BHW at sila ang unang nilalapitan ng mga buntis, magulang ng mga batang may sakit, senior citizen at mga pamilyang nangangailangan ng agarang serbisyong pangkalusugan.

Layunin ng panukala na malinaw na tukuyin ang tungkulin ng mga BHW, palakasin ang kanilang pagsasanay at sertipikasyon, palawakin ang oportunidad sa career development at gawing institusyonal ang kanilang mga benepisyo at insentibo.

Kabilang sa mga nakapaloob sa panukala ang minimum na buwanang honorarium na P3,000 para sa volunteer BHWs, transportation assistance, hazard pay, insurance coverage, psychosocial support at iba pang benepisyo.

Naglalaan din ang panukala ng mga landas para sa edukasyon, career advancement at civil service eligibility ng mga kuwalipikadong Barangay Health Workers.

Ayon sa senador, ang pamumuhunan sa mga Barangay Health Worker ay pamumuhunan sa preventive healthcare, mas malulusog na pamilya, mas matatag na komunidad at mas matibay na sistemang pangkalusugan, kaya nanawagan siya sa agarang pagpasa ng Senate Bill No. 1905.