MANILA, Philippines – Nagpulong sina Pangulong Ferdinand Marcos Jr. at Manila City Mayor Francisco “Isko Moreno” Domagoso sa Malacañang para pag-usapan ang hakbang ng pamahalaan sa pagpapatupad ng “legacy projects” sa Maynila.
Sa pahayag, sinabi ng Manila Public Information Office na kabilang sa mga pinag-usapan ay ang proposed Intramuros Office Park, North and South Harbor Bridge, retrofitting ng Lambingan Bridge, North-South Commuter Railway (NSCR), at Metropolitan Waterworks and Sewerage System (MWSS) pipe-laying project sa Pandacan.
“Mayor Domagoso also presented to President Marcos other projects under Manila’s 10-year comprehensive development plan, which were earlier endorsed by the City Development Council,” pahayag ng Manila Public Information Office.
Pagpapatuloy, pinag-usapan din nina Marcos at Moreno kung paano palalakasin ang infrastructure project monitoring, pag-uugnay sa mga pamilya sa kalsada at pagsisigurong maipapasok sila sa Pantawid Pamilyang Pilipino Program (4Ps) at iba pang programa ng Department of Social Welfare and Development (DSWD), pagsasagawa ng public information campaigns sa major national government programs, kabilang ang National Immunization Program at National ID registration.
Bukod dito, ibinida rin ng Manila LGU ang Binondominium 2 at 3, konstruksyon ng apat na in-city vertical housing towers sa compound ng Bureau of Plant Industry at “Land for the Landless” program sa apat na projected sites.
Layon din nito ang operasyon at maintenance ng Metropolitan Theater at pagbuo ng parking facilities sa ilalim ng Skyway at NLEX Connector viaducts para mapaluwag ang trapiko. RNT/JGC
