MANILA, Philippines — Binigyan ng Sandiganbayan Third Division si Sen. Rodante Marcoleta ng 10 araw upang ipaliwanag kung bakit hindi siya dapat patawan ng preventive suspension sa Senado habang nahaharap sa kasong plunder.
Sa kautusan nitong Hulyo 22 na inilabas sa media noong Huwebes, inatasan ng anti-graft court si Marcoleta, sa pamamagitan ng kanyang abogado, na tumugon sa loob ng non-extendible na panahon “to explain why he should not be preventively suspended from office as an incumbent member of the Philippine Senate.”
Ibinatay ng korte ang kautusan sa Section 5 ng Republic Act No. 7080 o Anti-Plunder Act, na nagtatakda ng preventive suspension sa mga opisyal ng pamahalaan na nahaharap sa kasong plunder.
Maaaring makaapekto ang posibleng suspensiyon sa pakikilahok ni Marcoleta sa paglilitis ng Senate impeachment court laban kay Vice President Sara Duterte. Sinabi noong Lunes ni Sen. Francis “Chiz” Escudero, senator-judge at presiding officer, na nagsumite si Marcoleta ng manifestation upang kilalanin ang kanyang boto sa mga pagdinig.
Sinabi ni Escudero na “inclined to agree” siya sa kahilingan hangga’t hindi nasususpinde si Marcoleta.
Si Marcoleta, na kabilang sa minority bloc na itinuturing na maka-Duterte, ay naghain noong Miyerkules ng not guilty plea sa kasong plunder at sa mga paglabag umano sa isang presidential decree na nagbabawal sa mga opisyal ng pamahalaan na tumanggap, at sa mga pribadong indibidwal na magbigay, ng mga regalo.
Hawak ng Third Division ang kaso kaugnay ng P75-milyong campaign donation na umano’y natanggap ni Marcoleta habang nanunungkulan bilang party-list representative. Ayon sa mga state prosecutor, hindi ito idineklara sa kanyang financial at campaign disclosures.
Sa naturang halaga, P30 milyon umano ang nagmula kay dating Rep. Mike Defensor, P25 milyon kay negosyanteng Joseph Espiritu, at P20 milyon kay negosyanteng Aristotle Viray. Kabilang din sila sa mga respondent sa kaso.
Nakakulong si Marcoleta sa male dormitory ng New Quezon City Jail sa Barangay Payatas mula pa noong Hulyo 15. Santi Celario
