MANILA, Philippines — Inaasahang maisasama sa power grid pagsapit ng 2035 ang unang kuryenteng malilikha mula sa nuclear power sa Pilipinas, tatlong taon na mas huli sa paunang target ng pamahalaan na 2032, habang hinihintay ang pag-usad ng mga regulatory at safety requirement.
“The grid integration, barring no changes yet made in the Philippine Grid Code and all of the other technical requirements, the actual injection of the capacities will start at around 2035 through 2038,” sinabi ni Department of Energy Energy Utilization and Management Bureau Director Patrick Aquino sa isang public consultation noong Huwebes.
Gumagawa na ang DOE ng mga alituntunin para sa kauna-unahang auction ng nuclear power generation capacity sa bansa. Saklaw ng draft rules ang mga requirement para sa mga kalahok, capacity allocation, presyo, kontrata, pagpili ng lugar, safety standards at suporta ng pamahalaan.
Sa ilalim ng panukalang alituntunin, maaaring kumuha ang pamahalaan ng hanggang 10-percent stake sa unang nuclear power project sa pamamagitan ng Philippine National Oil Co., Maharlika Investment Corp. o iba pang ahensiya ng gobyerno. Isasailalim ito sa negosasyon, due diligence, mga kinakailangang pag-apruba at fiscal regulations.
Nilagdaan ni Pangulong Ferdinand Marcos Jr. noong Setyembre 2025 ang Republic Act No. 12305, na lumikha sa Philippine Atomic Energy Regulatory Authority o PhilAtom.
Ang independent quasi-judicial body ang magkakaroon ng “sole and exclusive jurisdiction to exercise regulatory control” sa mapayapa, ligtas at secure na paggamit ng nuclear energy at radiation sources sa bansa.
Sinabi ni Aquino na patuloy na inihahanda ng pamahalaan ang mga kinakailangan para sa pagtatatag ng regulatory body kahit wala pang implementing rules and regulations ang batas.
“While it’s true that there are no specific implementing rules and regulations yet in place for RA 12305, the government has been preparing and is continuously preparing the requirements and is ready to assist the upcoming PhilAtom,” ayon kay Aquino. Dave Baluyot
