MANILA, Philippines – Pinaghahanda ang mga customer ng Meralco para sa mas mataas na singil sa kuryente ngayong Pebrero, matapos itaas ng kumpanya ang household rate nito ng 28.34 centavos per kWh, kaya’t aabot na ito sa P11.728 per kWh mula sa dating singil noong Enero.
Ang dagdag-singil ay katumbas ng P57 para sa mga tahanang kumokonsumo ng 200 kWh.
Tumaas ang generation charges ng 38.45 centavos per kWh dahil sa mas mataas na gastos mula sa Independent Power Producers (IPPs), mahinang piso, at pagtaas ng liquefied natural gas (LNG) terminal fees.
Ang paghina ng piso ay nagdulot din ng pagtaas sa 61% ng power supply agreement (PSA) costs ng 8.37 centavos per kWh.
Bahagyang nabawasan ang epekto ng pagtaas ng singil dahil sa pagbaba ng Wholesale Electricity Spot Market (WESM) charges ng 30.05 centavos per kWh, dulot ng pagbaba ng demand sa Luzon.
Hinihikayat ng Meralco ang mga customer na maging mas matipid sa kuryente, lalo na sa paparating na tag-init. Ang kumpanya ay nagsusuplay ng kuryente sa Metro Manila, Bulacan, Cavite, Rizal, Batangas, Laguna, Pampanga, at Quezon. RNT
