MANILA, Philippines – ITINALAGA ni Pangulong Ferdinand R. Marcos Jr. si Agrarian Reform Undersecretary Marilyn Barua-Yap bilang bagong Chairperson ng Civil Service Commission (CSC).
Pinalitan ni Barua-Yap si dating CSC chairperson Karlo Nograles, nagbitiw sa tungkulin ngayong buwan dahil sa pagtakbo bilang Alkalde ng Davao City sa 2025 midterm elections.
Base sa kanyang appointment paper na nilagdaan ni Pangulong Marcos araw ng Miyerkules, Oktubre 16, si Barua-Yap ay magsisilbi bilang CSC chairperson hanggang Feb. 2, 2029.
“By virtue hereof, you may qualify and perform the duties of the office, furnishing the Office of the President and the Civil Service Commission with copies of your Oath of Office,” ang nakasaad sa appointment paper ni Barua-Yap.
Bago pa ang kanyang bagong appointment, nagsilbi si Barua-Yap bilang undersecretary para sa Department of Agrarian Reform’s Special Concerns Office and External Affairs at Communications Operations Office.
Naging secretary general din si Barua-Yap sa Mababang Kapulungan ng Kongreso. Siya ang kauna-unahang babae na humawak ng naturang posisyon sa Kongreso.
Sa kabilang dako bukod kay Barua-Yap, itinalaga rin ng Pangulo si Dante Francis Mariano Ang II bilang chairperson ng Commission on Filipinos Overseas .
Pinalitan ni Mariano si Romblon V Arugay.
Ang appointment paper ni Mariano ay may petsang Oktubre 16 2024 at may lagda ni Pangulong Ferdinand Marcos Jr.
Samantala, kinumpirma ni Executive Secretary Lucas Bersamin sa isang text message ang pinakabagong appointment kay Barua-Yap habang si Presidential Communications Office (PCO) Secretary Cesar Chavez ang nagkumpirma ng appointment ni Mariano. Kris Jose
