MANILA, Philippines – Iniulat ng Department of Health (DOH) ang malaking pagbaba sa bilang ng mga batang Pilipino na hindi pa nakatatanggap ng kahit isang bakuna o tinatawag na zero-dose children, mula sa mahigit isang milyon noong 2020–2021 tungo sa 163,000 noong 2023.
Iniuugnay ng DOH ang pagbabagong ito sa pinaigting na kampanya sa pagbabakuna sa parehong pambansa at lokal na antas.
Batay sa datos ng ahensya, noong Pebrero 2025, nasa 1,542,282 sa 2,392,392 na mga batang may edad 0 hanggang 12 buwan ang fully immunized o kumpleto sa bakuna.
Bilang paggunita sa World Immunization Week (Abril 24–30), inilunsad ng DOH ang isang nationwide vaccination campaign na sinimulan sa Calbayog City, Samar, kung saan target na mabakunahan ang higit 31,000 katao.
Kasama sa mga bakunang ibibigay sa mga sanggol na may edad 0–12 buwan ang mga proteksyon laban sa tuberculosis, polio, pulmonya, tigdas, beke, at rubella, kabilang ang pentavalent vaccine.
Bukod sa mga sanggol, bibigyan din ng bakuna laban sa trangkaso at pulmonya ang mga senior citizen. Ang mga batang babae na may edad 9 hanggang 14 ay tatanggap ng HPV vaccine, habang ang mga buntis ay bibigyan ng bakuna laban sa tetanus at diphtheria.
Samantala, nagbabala si Behzad Noubary, acting representative ng UNICEF Philippines, na nananatiling marupok ang mga dekadang tagumpay sa childhood immunization kung walang tuloy-tuloy na aksyon.
Nagpahayag rin ng pagkabahala ang World Health Organization (WHO) ukol sa umiiral pa ring agwat sa accessibility at equity ng mga bakuna. (Jocelyn Tabangcura-Domenden)
