MANILA, Philippines – Binigyan ng Philippine National Police (PNP) ang mga field commander nito ng 36 oras para resolbahin ang mga insidente ng indiscriminate firings ng ilang pulis o masisibak mula sa pwesto ngayong holiday season.
Ito ay kasunod ng memorandum na inisyu ni acting chief Lt. Gen. Jose Melencio Nartatez Jr., sinabi ni PNP public information chief Brig. Gen. Randulf Tuaño sa isang forum sa Quezon City nitong Biyernes, Disyembre 12.
“If there was indiscriminate firing and there was a victim and they weren’t able to resolve the indiscriminate firing within 36 hours, we will implement the one-strike policy wherein the commander of that area of responsibility will be relieved and charged,” paliwanag ni Tuaño.
Noong nakaraang holiday season, mayroong 27 kaso ng illegal gun discharges kabilang ang isang tauhan ng PNP sa Calabarzon.
Ito ang dahilan para balaan ng PNP ang mga pulis sa paggamit ng kanilang service firearms sa selebrasyon ng Pasko at Bagong Taon. RNT/JGC
