MANILA, Philippines – Isinusulong ng Department of Tourism (DOT) ang pagsasama ng Mindanao sa national tourism circuit dahil sa matatag na seguridad, mayamang kultura, natatanging pagkain, at mga potensyal na ecotourism destination ng rehiyon.
Pinangunahan ni Tourism Assistant Secretary Ferdinand Jose Bagcal ang isang DOT team sa comprehensive validation ng mga tourist attraction sa Zamboanga Peninsula. Ang resulta ng validation ay isasama sa bubuuing national travel and tourism circuit.
Kabilang sa isinagawang site validation ang mga destinasyon sa Zamboanga del Sur, na naglalayong tuklasin ang mga lugar na maaaring maging bagong tourist destination bukod sa mga kilalang beach sa bansa.
“We want to focus on Mindanao this time because it is rich in exceptional tourist assets. Our goal is to link these destinations into cohesive circuits (in the Philippines) that travelers can easily navigate,” ani Bagcal.
Binigyang-diin din niya ang potensyal ng Pagadian City bilang tourism destination, partikular ang bagong bukas na Pagadian City Water Park sa boulevard.
“Pagadian is something waiting to be discovered. It has immense potential to emerge as a major destination,” ani Bagcal.
Kabilang sa mga pinuntahan ng DOT team ang Sto. Niño Cathedral, Tourism Boat, Regional Government Center, Provincial Government Center, Puting Balas sandbar at Bakilid Resort.
Bahagi rin ng validation ang kultura at heritage, kabilang ang pakikipag-ugnayan sa Subanen indigenous community sa Kumalarang at Lakewood.
Sa Kumalarang, nasaksihan ng delegasyon ang tradisyonal na paghahabi at paggawa ng mga handicraft at nakipagpulong sa mga lokal na opisyal na pinamumunuan ni Mayor Ruel Molina.
Samantala, binisita rin ng grupo ang Lakewood, na tahanan ng pinakamalaking freshwater lake sa lalawigan. Ang lawa ay may lawak na 800 ektarya at nasa paanan ng Mt. Serongan at Mt. Imbing.
Ayon kay Sara Mae Lee Monroy, lead project officer for cultural tourism ng DOT, maraming tourism assets ang Zamboanga del Sur na maaaring magbigay ng immersive experiences sa mga turista.
“We saw traditions, performances, and crafts that offer immersive experiences. Even simple mat weaving is something travelers should witness firsthand,” ani Monroy.
Binigyang-diin din niya ang kahalagahan ng pagpapakita sa mga turista ng kultura, hospitality at diversity ng Mindanao upang mabago ang mga negatibong pananaw tungkol sa rehiyon.
“Mindanao is safe, relaxing, and full of unique food and adventure. There is more to the Philippines than Boracay, Davao, or Bohol—Zamboanga Peninsula deserves a place on the tourism map,” dagdag niya.
Pinuri naman ni Bagcal ang mga lokal na pamahalaan sa kanilang pamumuhunan sa tourism infrastructure at product development, gayundin ang kahandaan ng tri-people na makilahok sa pagpapaunlad ng turismo sa lugar. RNT/JGC
