Nature-based solusyon sa pagbaha, ibinida ng Malolos

BULACAN, Philippines – Bumisita nitong Setyembre 29 sina Netherlands Ambassador to the Philippines Roderick Wols at DPWH Secretary Vince Dizon, kasama ang mga delegado ng ASEAN-Netherlands Cross Learning Workshop at mga opisyal ng Malolos City, sa nature-based flood solution sa Barangay Pamarawan.

Ang Pamarawan ay isang flood-prone island community sa North Manila Bay na madalas makaranas ng coastal flooding. Sa proyekto, ginagamit ang mga materyales at prosesong nakabatay sa kalikasan, kabilang ang bamboo structures, oyster bags at sediment traps upang bawasan ang lakas ng alon, makatulong sa pag-iipon ng sediment at suportahan ang pagbabalik ng mangrove at iba pang coastal habitats.

Ayon sa mga ulat, kinilala ni Dizon ang bamboo cribbing ng Malolos bilang isang halimbawa ng nature-based engineering na maaaring makatulong sa pagpapatatag ng mga pampang, pagbawas ng soil erosion at pag-iwas sa pagbaha. Sinabi rin niyang maaaring pag-aralan ang paggamit nito sa iba pang flood-prone na lugar sa Bulacan at karatig-Pampanga.

Bahagi ito ng tatlong araw na ASEAN Cross-Learning Event 2026 na may temang “Beyond the Risk: Strategic Choices for Climate-Resilient Countries in ASEAN,” kung saan nagbabahagi ang mga kalahok ng mga karanasan at estratehiya sa climate adaptation, disaster preparedness at risk reduction.

Samantala, sinabi ni Dizon sa isang naunang talakayan na dapat pagsamahin ang nature-based solutions at conventional infrastructure depende sa pangangailangan ng lugar. Kabilang sa mga hakbang na tinatalakay para sa flood-prone areas ng Bulacan ang earth dikes, mangrove restoration at natural detention basins.

Ang nature-based coastal protection pilot sa Pamarawan ay bahagi ng pakikipagtulungan ng Pilipinas at Netherlands at isinasagawa sa tulong ng Netherlands Enterprise Agency, Rijkswaterstaat at iba pang partners. Layunin nitong maprotektahan ang kabuhayan ng komunidad habang pinapalakas ang natural na depensa ng baybayin laban sa pagbaha. RNT/MDS