Umiskor si Kawhi Leonard ng 39 puntos sa 15-of-19 shooting nang talunin ng bisitang Los Angeles Clippers ang Denver Nuggets, 105-102 noong Lunes para ipantay ang kanilang Western Conference first-round playoff series sa tig-isang panalo.
Sina Christian Braun at Nikola Jokic ng Denver ay sumablay sa 3-point attempts para tapusin ang laro. Natapos si Jokic ng triple-double.
Nagdagdag si James Harden ng 18 puntos, nag-ambag si Ivica Zubac ng 16 puntos at 12 rebounds at umiskor si Norman Powell ng 13 puntos para sa Los Angeles.
“Mahirap na laban,” sabi ni Leonard sa postgame sa TNT. “Ito ang tungkol sa playoffs.”
Lilipat ang best-of-seven series sa California para sa Game 3 sa Huwebes sa Inglewood.
Nakabangon si Leonard mula sa seven-turnover performance sa opener noong Sabado, 112-110 panalo ng Denver sa overtime. Naitama niya ang kanyang unang anim na shot, sumablay ang pullup jumper sa unang bahagi ng second quarter at hindi na muling nagpalampas hanggang sa unang bahagi ng fourth.
Umiskor siya ng 12 puntos sa huling yugto at natapos ang laro sa isang turnover lamang.
Ang Denver ang koponan na sinalanta ng turnovers sa Game 2. Nagtapos ang Nuggets na may 20 — tumugma sa kabuuan ng Clippers mula Sabado. Si Jokic ay nagkaroon ng pitong giveaways noong Lunes sa kanyang 26 points, 12 rebounds at 10 assists.JC
