MANILA, Philippines – May mortality rate na 40% hanggang 75%, at karaniwang naipapasa ang Nipah virus mula sa infected na hayop patungo sa tao sa pamamagitan ng close contact o pagkain ng kontaminadong karne.
Pero sa halip na higpitan ang galaw ng mga manlalakbay, sinabi ng Department of Health na inirekomenda ng Bureau of Quarantine ang pagpapataas ng kamalayan tungkol sa Nipah virus.
Ayon kay DOH spokesperson Asec. Albert Domingo, nagpadala na ang BOQ ng impormasyon at mga education materials tungkol sa Nipah virus sa lahat ng points of entry kasunod ng mga kaso na natuklasan sa West Bengal, India. Ito, ayon sa DOH, ay sinusubaybayan sa pandaigdigang antas.
Nanatiling bukas ang border ng Pilipinas at nagpapatuloy ang proactive border screening, kabilang ang online health declaration, thermal scanning pagdating, at trained observation ng mga manlalakbay, upang maprotektahan ang mga Pilipino laban sa mga darating na sakit.
Wala rin aniyang internasyonal na rekomendasyon para sa mga paghihigpit sa paglalakbay.
Nagpakalat ang DOH-BOQ ng impormasyon tungkol sa NiV sa lahat ng points of entry (PoE).
Kasama rito ang mga sintomas tulad ng lagnat, sakit ng ulo, at hirap sa paghinga; paraan ng pagkahawa tulad ng direktang pakikipag-ugnayan sa mga nahawaang paniki, baboy, o kontaminadong prutas; at mga paraan ng pag-iwas.
Sa India, dalawang kaso ng Nipah virus ang kumpirmado, at 100 close contacts ang mahigpit na binabantayan. Samantala, ang mga kalapit na bansa tulad ng Thailand at Malaysia ay nagpatupad ng mas mahigpit na airport screening procedures.
Ayon sa DOH, handa ang Pilipinas na tumugon sakaling matukoy ang virus sa bansa, batay sa 2023 guideline nito para sa virus response.
Ayon sa World Health Organization, ang NiV ay isang zoonotic virus na maaaring maipasa mula sa kontaminadong pagkain o sa pagitan ng tao.
