OFW Party-list naghain ng petisyon sa Korte Suprema

MANILA, Philippines – NAGHAIN ng petisyon sa Korte Suprema ang OFW Party-List upang hilingin na rebisahin ang komputasyon sa mga nakapasok na partylist group at maglabas ng Temporary Restraining Order (TRO) na pipigil sa implementasyon ng inilabas na resolusyon ng National Board of Canvassers dahil nawawalan ng tunay na kinatawan ang mga marginalized sectors.

Batay sa petisyon, may legal na epekto ang resolusyon sa pamamahagi ng 63 upuan sa kongreso ng mga nanalong partylist sa papasok na 20th Congress sa halip na 64 batay sa umiiral na batas, kaya’t hiling din nila na rebisahing muli ang komputasyon sa inilaang upuan.

Ayon kay OFW Party List Rep. Marissal “Del Mar” Magsino, hindi lang umano ito laban ng kanilang partylist kundi ito ay laban para sa mga sektor na tunay na kumakatawan sa mga nasa laylayan na pilit na inaalisan ng boses sa lehislatura.

Kabilang sa kinwestyon sa nasabing petisyon ay ang paggamit ng BANAT formula kung saan naniniwala anv nasabing partylist group na ito ay pumapabor sa malalaki at may malaking pondong grupo na lampasan ang 2% limitasyon ng boto na dahilan upang maisantabi ang mga maliliit na tunay na kumakatawan sa marginalized sectors.

Kaugnay nito, nagpahayag ng kumpiyansa ang OFW Party List na aaksiyunan ng Korte Suprema ang kanilang hirit na TRO o Status Quo Ante Order o ng Writ of Preliminary Injunction nang may matinding pangangailangan.

Nabatid na nasa ika-59 na puwesto ang OFW Party List kung saan nakakuha ito ng 245,819 na boto sa nagdaang halalan kaya’t naniniwala sila na kapag narebisa ang komputasyon, maaaring makakuha silang muli ng isang upuan upang magkaroon ng boses ang mga OFWs. RNT