MANILA, Philippines – Isang lalaking Australiano ang inaresto sa Makati City matapos umanong mahuling gumagamit ng iba’t-ibang pagkakakilanlan at sa overstaying sa bansa, ayon sa Bureau of Immigration.
Ayon sa Bureau’s Fugitive Search Unit (FSU) ang dayuhan na si Dayle Marc George Campbell, 33, ang nahuli sa Pertierra St., Barangay Poblacion, sa isang enforcement operation na isinagawa gabi ng Setyembre 15 hanggang umaga ng Setyembre 16 sa pakikipagtulungan ng Makati City Police Station–Intelligence Section.
Sinabi ng mga awtoridad na ang dayuhan ay kilala rin sa mga alyas na Dion Munro at Daniel John, at sinasabing mamamayan ng Seychelles at Australia.
Ang isang reklamong natanggap ng BI ay nagsabing siya ay gumagamit ng mapanlinlang na mga dokumento sa imigrasyon at hiniling ang kanyang deportasyon sa sandaling mahuli. Sinabi pa ng nagrereklamo na si Campbell ay sangkot sa mga aktibidad na may kaugnayan sa droga at may rekord ng mapang-abusong pag-uugali.
Ang impormasyon mula sa Australian Embassy ay nagpakita na si Campbell ay iniulat na lumabag sa Republic Act 9262 (Anti-Violence Against Women and Their Children Act of 2004) kaugnay ng isang insidente noong 2021 na kinasasangkutan ng kanyang live-in partner. Nagtataglay din umano siya ng mga hindi lisensyadong baril.
Sa pag-verify sa database ng BI, naisiwalat na siya ay pumasok sa bansa noong Pebrero 22, 2020, gamit ang kanyang Australian passport pagkatapos na umalis dati na may Seychelles passport. Siya ay tinanggap bilang isang temporary visitor ngunit nabigong mag-aplay para sa extension ng visa, na naging dahilan upang siya ay maging isang overstaying na dayuhan.
Kinumpirma rin ng United States Drug Enforcement Administration (DEA) na si Campbell ang paksa ng patuloy na imbestigasyon sa pinaghihinalaang money laundering at narcotics trafficking. Siya ay iniulat na kaanib sa isang outlaw motorcycle gang at natagpuang gumagamit ng mga mapanlinlang na lisensya sa pagmamaneho ng US sa ilalim ng kanyang mga alyas.
Mananatili siya sa kustodiya ng BI habang nahaharap sa mga kasong deportasyon. RNT/MND
