P180M na smuggled cigarettes, nasabat ng BOC

MANILA, Philippines – TINATAYANG nasa ₱180 milyon halaga ng mga ismagel na sigarilyo ang naharang ng mga tauhan ng Bureau of Customs (BOC) matapos masabat ang isang barko na may kargang tinatayang 3,000 master cases noong Pebrero 24, 2026 sa Celebes Sea.

Ayon sa ulat, nag-ugat ang operasyon sa natanggap na intelligence report ng BOC hinggil sa kahina-hinalang galaw ng isang bulk carrier na umano’y nagsasagawa ng “ship-to-ship transfer” o palihim na paglilipat ng kargamento sa laot.

Dahil dito, agad na nakipag-ugnayan ang BOC sa Department of National Defense (DND) at sa Philippine Navy – Western Mindanao Naval Command.

Sa pangunguna ni RADM Constancio Arturo M. Reyes, commander ng Western Mindanao Naval Command, isinagawa ang joint anti-smuggling operation na nagresulta sa pagkakasabat sa naturang sasakyang pandagat. Natukoy at nasabat ang barko bandang 52 nautical miles kanluran ng Kalamansig Port.

Sa isinagawang inspeksyon, tumambad ang libu-libong kahon ng sigarilyo na walang kaukulang dokumento para sa legal na pag-angkat. Hindi rin umano makapagbigay ng malinaw na paliwanag ang dayuhang tripulante hinggil sa pinagmulan at legalidad ng kargamento.

Batay sa paunang imbentaryo, umaabot sa hindi bababa sa ₱180 milyon ang halaga ng mga nasabat na produkto.

Matapos makumpirma ang paglabag, agad na sinunod ng mga awtoridad ang itinakdang proseso kaugnay ng posibleng paglabag sa Republic Act No. 10863 o Customs Modernization and Tariff Act.

Ineskortan ang barko patungong Naval Station Romulo Espaldon kung saan ito dumating noong Pebrero 25, 2026 para sa opisyal na imbentaryo at dokumentasyon.

Sa pahayag ni Commissioner Ariel F. Nepomuceno, tuloy-tuloy at walang uurungan ang kampanya ng BOC laban sa iligal na kalakalan ng sigarilyo. Aniya, hindi papayagan ng pamahalaan na makalusot ang ganitong uri ng operasyon na pumipinsala sa ekonomiya at sa lehitimong negosyo sa bansa.

(Jay Reyes)