MANILA, Philippines – Iniutos ng Court of Appeals nitong Martes ang pag-freeze ng 836 bank accounts na konektado sa mga indibidwal at kumpanyang iniimbestigahan dahil sa umano’y maling paggamit ng pondo para sa flood control projects, ayon sa Anti-Money Laundering Council (AMLC).
Kasama rin sa frozen assets ang 12 e-wallets, 24 insurance policies, 81 sasakyan, at 12 ari-arian—na tinawag ng AMLC na “the most extensive asset freeze since the probe began.”
Umabot na sa ₱2.9 bilyon ang kabuuang halaga ng na-freeze na assets, na inaasahang tataas pa habang nagpapatuloy ang imbestigasyon. “By freezing a wide range of assets… the AMLC is disrupting the financial channels used in corrupt activities,” ayon kay executive director Matthew David.
Dagdag pa niya: “Our goal is straightforward: prevent stolen public funds from being dissipated and misused, recover them for the National Government, and ensure that those involved in money laundering are held accountable.”
Ayon sa AMLC, nakadagdag ang kautusan sa mga naunang direktiba na nag-freeze na ng mahigit 1,500 bank accounts, 54 insurance policies, 154 sasakyan, 30 ari-arian, at 12 e-wallets.
Nauna nang hiniling ng Department of Public Works and Highways na i-freeze ang bilyong halaga ng air assets na konektado kay Ako Bicol Rep. Elizaldy “Zaldy” Co at kapatid niyang si Christopher, na nadadawit din sa kontrobersiya. Nagsasagawa rin ng sariling imbestigasyon ang Bangko Sentral ng Pilipinas sa ilalim ng Anti-Financial Scamming Act. RNT
