P20M marijuana plantasyon sa Nueva Vizcaya, nadiskubre

DUPAX DEL SUR, Nueva Vizcaya — Nadiskubre at tuluyan nang binunot at sinunog ng mga awtoridad ang P20 milyong halaga ng marijuana na nakatanim sa isang plantasyon sa Sitio Gunot, Kimbotan, Dupax del Sur, Nueva Vizcaya.

Pinangunahan ni PMajor Anthony Ayungo, hepe ng Dupax del Sur Police Station, katuwang ang 2nd PMFC sa pamumuno ni PMajor Randy Velarde, kabilang ang Provincial Intelligence Unit at Provincial Drug Enforcement Group.

Una rito, nakatanggap ng impormasyon ang pulisya ukol sa plantasyon ng marijuana sa nasabing lugar kaya’t agad silang nagpadala ng tauhan upang kumpirmahin ito. Nang mapatunayang may mga tanim ng ipinagbabawal na droga roon, agad silang nagsagawa ng operasyon upang hulihin sana ang mga nagtanim at sirain ang mga marijuana.

Nasa 10,311 na puno ng marijuana ang binunot na tinatayang nasa P20 milyon ang halaga sa 1,200 square meter na taniman. Ang iba ay malalaki na at malapit nang anihin at namumulaklak na, habang ang iba ay nasa iba’t ibang laki.

Ayon kay PMaj. Ayungo, sadyang itinanim ang mga ito dahil may land preparation para tamnan ng marijuana. Medyo malayo ang lugar kung saan halos mahigit isang oras ang lakaran.

Wala naman silang naabutang tao sa lugar kaya’t patuloy nilang iniimbestigahan ang nasa likod ng nadiskubreng plantasyon ng marijuana.

Inisa-isang binunot at binilang ang mga marijuana bago sinunog ang mga ito ng pulisya.

Malaking bagay umano sa pulisya na nadiskubre at nasira ang mga marijuana na maaaring maibenta at makasira sa buhay ng mga gagamit nito.

Samantala, babantayan umano ng pulisya ang nasabing lugar at mga kalapit nito upang masigurong walang muling magtatanim at masira ang mga uusbong at tutubo muli. (Rey Velasco)