MANILA, Philippines – SINALAKAY ng pinagsamang operatiba ng Department of Trade and Industry’s Fair Trade Enforcement Bureau at National Police ang isang tindahan na nagbebenta ng ipinagbabawal na Flava vape products malapit sa Baclaran Elementary School sa Paranaque City, araw ng Miyerkules.
Sinabi ni DTI-FTEB Director Fhillip Sawali na nalambat sa naturang pagsalakay ang 452 kahon ng illegal vape products na nagkakahalaga ng P25 milyon.
Sinalakay ang tindahan na may 20 metro lang ang layo sa eskwelahan dahil sa paglabag sa Republic Act No. 11900, o Vaporized Nicotine and Non-Nicotine Products Regulation Act of 2022.
Ipinagbabawal ng batas ang pagbebenta ng vapes o e-cigarettes “within 100 meters of any point of the perimeter of a school, playground or other facility frequented particularly by minors.”
Bago pa ito, ipinag-utos ng FTEB ang suspensyon ng pagbebenta, pagmamanupaktura, pag-angkat at distribusyon ng Flava Corporation’s vape products noong Marso 15 batay sa RA 11900.
Dahil dito, ipinag-utos ni DTI Secretary Fred Pascual sa tauhan ng FTEB na alisin ang non-compliant products mula sa merkado.
Samantala, nagbabala si Pascual sa manufacturers, importers, distributors at retailers’ na maugnay sa iligal na gawain ng pangangalakal ng illicit vapes at iba pang iligal na produkto.
Matatandaang sa isinagawang operasyon noong Abril 24, natuklasan ng mga awtoridad na ang tindahan ay gumagamit ng milk tea shop bilang ‘front’ para makapagbenta at mamahagi ng ipinagbabawal na vapes.
Kapwa naman inihayag nina Sawali at DTI Assistant Secretary Amanda Marie Nograles ng Consumer Protection Group na ang nabanggit na pagsalakay ay nagbigay ng malakas at matibay na ebidensiya laban sa patuloy na pagbebenta at pagbabawal ng Flava products. RNT
