MANILA, Philippines – Inilabas na ng Department of Budget and Management (DBM) ang mahigit P30 bilyon na susuporta sa dagdag-sahod ng mga empleyado ng pamahalaan.
Sa pahayag ng DBM nitong Miyerkules, Setyembre 11, sinabi ng DBM na nakapaglabas na ito ng kabuuang P31.93 bilyon sa 257 departamento at ahensya.
Ayon sa Budget Department, ipinoproseso na rin nito ang paglalabas ng pondo para sa salary hike ng mga manggagawa sa 58 pang ahensya.
Maaalalang nag-isyu si Pangulong Ferdinand Marcos Jr. ng Executive Order (EO) 64 noong Agosto 2, 2024, na sumasakop sa civilian government personnel sa executive, legislative, at judicial branches; constitutional commissions at iba pang constitutional offices, maging ang mga empleyado mula sa government-owned and -controlled corporations (GOCCs) at local government units (LGUs).
“We are doing everything we can so that we can release the budget to all agencies as soon as possible. Ito po ‘yung pinakahihintay ng ating mga kasamahan sa gobyerno. Of course, we also urge the heads of the departments and agencies to immediately distribute the salary differential since (the) increase po is retroactive starting January of this year,” pahayag ni Budget Amenah Pangandaman.
Sa State of the Nation Address ni Marcos noong Hulyo, sinabi nito na naglaan ang administrasyon ng pondo para sa salary adjustments ng mga manggagawa sa pamahalaan.
Samantala, sinabi ng DBM na ipinag-utos ni Pangandaman ang paglikha ng Salary Standardization Law VI (SSL VI) dashboard “in the spirit of transparency, accountability, and good governance.”
“This dashboard reflects our commitment to transparency and open government. What we want is for the people and our stakeholders to be informed as well as updated in real-time about our budget releases,” ani Pangandaman.
Ang salary increase dashboard ay maaaring makita sa official website ng DBM sa pamamagitan ng link na https://www.dbm.gov.ph/
“Note that release of funds relative to salary increase is based on the submitted requests of agencies to the DBM on their respective salary adjustment computations and requirements,” ayon pa sa DBM. RNT/JGC
