MANILA, Philippines – Nasamsam ng Bureau of Internal Revenue (BIR) ang mahigit ₱516 milyong halaga ng iligal na sigarilyo sa Valenzuela City bilang bahagi ng kampanya ng gobyerno laban sa underground tobacco trade at pagtagas ng buwis.
Sa operasyong isinagawa kasama ang Department of the Interior and Local Government (DILG), kinumpiska ng mga tauhan ng BIR ang 1,274 master cases ng sigarilyo na walang mandatory internal revenue stamps, na kinakailangan sa ilalim ng National Internal Revenue Code.
Ayon sa BIR, ang tinatayang excise tax deficiency, kasama ang mga multa at surcharge, ay umabot sa ₱516,795,424.60. Nagsimula ang operasyon matapos makatanggap ng intelligence report ang BIR mula sa DILG.
Iniutos ni BIR Commissioner Charlito Martin R. Mendoza ang agarang paglalabas ng mission orders para sa field verification at ipinadala ang mga tauhan ng Revenue Region No. 5 sa tinukoy na lugar.
Ipinapakita ng pagkakatuklas ng mga unstamped na produkto ang umano’y organisadong paraan upang iwasan ang excise tax, na mahalagang pinagkukunan ng pondo ng pambansang badyet at universal healthcare.
Binibigyang-diin din ng insidente ang patuloy na problema ng illicit trade sa Pilipinas, kung saan ang mataas na buwis sa sigarilyo ay nagtutulak sa bentahan ng mas murang, hindi binubuwisang produkto.
Pinaigting na ng BIR ang pagbabantay at enforcement sa mga industrial area tulad ng Valenzuela City, na madalas gawing imbakan o daanan ng kontrabando.
Muling iginiit ni Mendoza na ipagpapatuloy ng ahensya ang mahigpit na pagpapatupad ng batas sa buwis upang maprotektahan ang mga lehitimong negosyong sumusunod sa regulasyon.
Sa ilalim ng Tax Code, ang kawalan ng wastong revenue stamps ay itinuturing na prima facie evidence ng hindi pagbabayad ng excise tax, kaya’t maaaring agad kumpiskahin ang mga produkto.
Inaasahang magsasampa ang BIR ng criminal charges laban sa mga responsable sa bodega at iligal na imbentaryo.
Ang operasyon ay bahagi ng mas malawak na hakbang ng administrasyon upang maisara ang revenue leakages at mapabuti ang koleksyon ng buwis nang hindi nagpapataw ng bagong buwis sa publiko. RNT/MND/Val Leonardo
