MANILA, Philippines – Nagpatotoo ang isang inhinyero ng Department of Public Works and Highways (DPWH) na naghatid siya ng hindi bababa sa P5 bilyon mula sa mga kontratista kay dating DPWH Bulacan 1st District Engineer Henry Alcantara, katumbas umano ng 25 porsiyento ng halaga ng mga proyektong pang-imprastraktura sa Bulacan mula 2022 hanggang 2025.
Si Carlo Rivera, na umano’y inuutusan ni Alcantara, ay nagbigay ng testimonya sa pagdinig sa piyansa ni dating House Speaker Martin Romualdez kaugnay ng kasong plunder sa umano’y P7.4-bilyong kickback scheme sa mga proyekto ng pamahalaan.
Ayon kay Rivera, ang perang ibinigay kay Alcantara ay ipinapasa naman umano kay dating Ako Bicol Rep. Zaldy Co, na siyang namamahagi nito sa mga proponent ng proyekto.
Sinabi niyang ang 25 porsiyentong komisyon ay bahagi ng halaga ng mga proyektong pang-imprastraktura sa Bulacan, na nagkakahalaga ng P519 milyon noong 2022, P12.93 bilyon noong 2023, P14.19 bilyon noong 2024 at P7.385 bilyon noong 2025.
ROMUALDEZ, WALA UMANO SA LISTAHAN NG MGA PROPONENT
Kinumpirma rin ni Rivera na siya ang gumawa ng pinagsama-samang listahan ng mga proponent ng flood control projects. Kabilang dito sina Co, dating DPWH Undersecretary Roberto Bernardo, Sen. Jinggoy Estrada at dating Sen. Ramon “Bong” Revilla Jr.
Ayon kay Rivera, ipinasa ni Alcantara ang listahan upang mabigyan ng pondo ang mga proyektong tinukoy ng mga proponent.
Nang tanungin ng depensa kung wala sa listahang ginawa niya si Romualdez, sumang-ayon si Rivera.
PAG-UUGNAY SA MGA KONTRATISTA
Nagpatotoo rin si Rivera na madalas niyang samahan ang mga kontratistang nagdadala ng pera kay Alcantara.
“Ii-store ko dun sa room [sa loob ng office ni Alcantara] and ire-relay ko kay D.E. [Alcantara] na delivered na,” ani Rivera.
Sinabi niyang ibinigay sa kanya ni Alcantara ang mga contact detail ng mga kontratista upang maisaayos ang paghahatid ng pera.
Direkta umano siyang nakipag-ugnayan kay Eumir Villanueva, may-ari ng Topnotch Catalyst Builders. Ang mga contact naman niya sa iba pang kontratista ay sina “Alex” ng ARL Builders, “Jessica” ng Wawao Builders at “Robert” ng IM Construction Corp.
Para sa SYMS Construction Trading, si dating DPWH Bulacan 1st District Assistant Engineer Brice Hernandez ang kanyang contact. Nauna nang nagpatotoo si SYMS contractor Sally Santos sa kasong malversation ni Revilla na ipinahiram niya ang lisensiya ng kanyang kontrata kay Hernandez, na nangakong magpapatupad ng mga proyekto.
Ayon kay Rivera, si Alcantara mismo ang tumukoy sa mga proponent ng proyekto.
Nauna nang sinabi ni Wirt Walter Rosales, dating personal assistant ni Alcantara, na tinulungan niyang magbilang ng perang galing sa mga kontratista si Rivera sa isang “secret room” sa opisina ni Alcantara. Inilalagay umano ang pera sa mga plastik na lalagyan o maleta bago ihatid kay Co.
Nang ipakita sa korte ang mga itim na plastik na lalagyan, kinumpirma ni Rivera na iyon ang ginagamit nila.
Sinuspinde si Rivera mula Setyembre 2025 hanggang Marso 2026 at kasalukuyan siyang naka-floating status.
ARI-ARIAN NA INIUUGNAY KAY CO
Samantala, iminungkahi ng prosekusyon na kilalanin ang mga dokumento ng titulo ng isang ari-ariang pag-aari ng ECO Leisure and Hospitality Holding Company sa Horizon Homes, Bonifacio Global City, Taguig. Ayon sa prosekusyon, sina Co at ang kanyang asawang si Mylene ang mga tunay na benepisyaryo ng ari-arian.
Iginiit din ng prosekusyon na si Mylene Co ang lumagda sa deed of sale bilang chief financial officer ng kumpanya.
Sumang-ayon ang depensa sa pagiging tunay ng mga dokumento ngunit nilinaw na hindi nito inaamin na si Co ang tunay na may-ari ng ari-arian.
Nauna nang binanggit ng mga dating bodyguard ni Co ang unit sa BGC bilang lugar kung saan sila naghahatid ng mga maletang puno ng pera. Dito umano iniimbak ang pera bago ipamahagi sa mga proponent ng proyekto.
Nakatakdang tumestigo sa Huwebes si dating DPWH Undersecretary Roberto Bernardo. RNT/MDS
