MANILA, Philippines- Tinatayang nasa P9.6 milyong halaga ng marijuana ang nasamsam sa isang drug suspect matapos maaresto ng pulisya sa isinagawang buy-bust operation sa Valenzuela City.
Kinilala ang naarestong suspek na si alyas Ritchie, 49, residente ng Lauan St., Woodsville Subdivision, Camp 7 Baguio City.
Ayon sa ulat, nagawang makipagtransaksyon sa suspek ng mga operatiba ng Intelligence and Foreign Liaizon Division (IFLD) ng Philippine National Police-Drug Enforcement Group (PNP-PDEG) at napagkasunduan umano ng mga ito na sa NLEX Valenzuela gaganapin ang transaksyon.
Kasama ang SOU-NCR, agad ikinasa ng PNP-PDEG ang joint buy-bust operation na nagresulta sa pagkakaaresto sa suspek sa KM17 Drive and Dine NLEX Southbound Brgy., Canumay West, dakong alas-9 ng gabi.
Nakumpiska sa suspek ang 80 pirasong brown rolled masking tape na naglalaman ng humigit-kumulang 80,000 gramo ng hinihinalang pinatuyong dahon ng marijuana na may estimated value na P9,600,000, buy-bust money na isang genuine P1,000 bill at bundles ng P1,000 boodle money, cellphone, IDs, dalawang ATM cards, brown shoulder bag at isang kulay asul na Toyota Vios.
