MANILA, Philippines — Inihayag ni Sen. Robinhood Padilla na susuportahan niya ang panawagang baguhin o bawiin ang tinatawag na “Robin Padilla Law” kaugnay ng loose firearms, kasabay ng pagsasabing pabor din siya sa martial law kung idedeklara ito bilang tugon sa lumalalang kriminalidad.
Sa Facebook post nitong Miyerkules, Agosto 19, sinabi ni Padilla: “Mas mabuting balita ang Martial Law kaysa sa walang batas o pambabaluktot ng batas! Declare it and I will support!”
Sinabi rin ng senador na naniniwala siyang seryoso si Interior Secretary Jonvic Remulla sa kampanya laban sa krimen at binanggit ang pagbabalik ng tinatawag niyang “kamay na bakal” ng dating Pangulong Ferdinand Marcos Sr.
Gayunman, sa ilalim ng Article VII, Section 18 ng 1987 Constitution, hindi maaaring ideklara ang martial law dahil lamang sa kriminalidad. Ang Pangulo lamang ang maaaring magdeklara nito sa Pilipinas o bahagi nito kapag may invasion o rebellion at kinakailangan ito ng public safety, at nakapailalim ang deklarasyon sa pagsusuri ng Kongreso at Korte Suprema.
Kasabay nito, suportado rin ni Padilla ang panawagan ni Remulla na higpitan muli ang batas laban sa loose firearms. Hiniling ng kalihim sa Kongreso na gawing non-bailable ang illegal possession ng loose firearms kasunod ng mga insidente ng pamamaril sa mga paaralan.
Ang tinatawag na “Robin Padilla Law” ay Republic Act No. 8294, isang batas noong 1997 na nag-amyenda sa Presidential Decree No. 1866 at nagpababa ng ilang parusa kaugnay ng illegal possession of firearms. Hindi na rin RA 8294 lamang ang umiiral na pangunahing batas sa firearms dahil ilang probisyon nito ay kalaunang pinawalang-bisa o pinalitan ng RA 10591 o Comprehensive Firearms and Ammunition Regulation Act of 2013.
Sinabi rin ni Padilla na mayroon siyang panukalang Senate Bill No. 2412 na naglalayong papanagutin ang mga lehitimong gun owner na nagpabaya sa pag-secure ng kanilang armas kung magamit ito ng ibang tao sa paggawa ng krimen, at magpataw ng mas mabigat na parusa kung government employee o opisyal ang nagpabaya.
Lumakas ang panawagan para sa mas mahigpit na pananagutan ng gun owners matapos ang pamamaril sa Ateneo de Zamboanga University noong Agosto 18, kung saan mga baril na pag-aari ng ama ng hinihinalang student shooter ang iniulat na nagamit sa insidente. RNT
