MANILA, Philippines – Inaprubahan ng Senado sa third at final reading ang panukalang batas na nagbabawal sa mga kamag-anak ng public officials at government personnel hanggang ikaapat na antas ng consanguinity o affinity na lumahok sa mga kontrata ng gobyerno.
Ang Senate Bill No. 1962 o Government Contracting and Procurement Integrity Act ay inaprubahan noong Setyembre 2 sa botong 15 pabor, zero tutol at zero abstention.
Saklaw nito ang mga government contract para sa supplies, materials, machinery, equipment, services, infrastructure projects, joint ventures, public-private partnerships at iba pang kasunduang gumagamit ng pondo o ari-arian ng gobyerno.
Hindi rin maaaring lumahok ang mga disqualified na kamag-anak bilang subcontractor o bahagi ng consortium, joint venture at katulad na business arrangements.
Ayon kay Sen. Francis “Chiz” Escudero, sponsor ng panukala, makatutulong ito upang maiwasan ang paggamit ng procurement rules para sa kapakinabangan ng iilang tao at kanilang pamilya.
“Enacting this measure will help put an end to the systemic gaming of procurement rules for the benefit of a favored few and their families,” ani Escudero.
“It removes temptation, shuts the side door, and makes it clear that government contracts are not a family affair,” dagdag niya.
“In other words, it narrows the discretion that enables corruption. Because if you minimize discretion, you minimize corruption. And when you eliminate the discretion to favor relatives and kin, you strike at corruption at its source, and help ensure that public procurement truly serves the public good,” pahayag pa niya.
Sa ilalim ng panukala, kailangang magsumite ng sworn affidavit ang mga pribadong kumpanyang sasali sa government procurement. Dapat nitong ideklara na ang kumpanya, mga opisyal, board members at beneficial owners nito ay walang ipinagbabawal na relasyon sa mga sakop na public officials.
Kabilang sa mga covered officials ang mga halal na lokal at pambansang opisyal, Cabinet secretaries, undersecretaries, assistant secretaries, opisyal at miyembro ng GOCCs, state universities and colleges (SUCs), at kanilang mga kinatawan.
Ang lalabag ay maaaring makulong ng 1 hanggang 3 taon, pagmultahin ng hindi bababa sa P100,000, at permanenteng pagbawalang lumahok sa government procurement. Maaari ring maharap sa parehong parusa ang responsableng public officials, kabilang ang permanenteng diskwalipikasyon sa paghawak ng public office.
Ang panukala ay inakda nina Senate President Sherwin Gatchalian at Senators Escudero, Christopher “Bong” Go, Joel Villanueva, Ronald “Bato” dela Rosa, Joseph Victor “JV” Ejercito, Loren Legarda at Francis “Kiko” Pangilinan. RNT/MDS
