NAGLABAS ng pangamba ang mga samahan ng pharmacist at mga may-ari ng botika sa panukala ng Department of Trade and Industry (DTI) na pahintulutan ang mga sari-sari store na magbenta ng mga over-the-counter (OTC) na gamot, kagaya ng mga bitamina at supplement, kahit walang reseta.
Ayon sa DTI, layunin ng hakbang na ito na mapalawak ang akses ng publiko sa mahahalagang produktong pangkalusugan habang binibigyang kabuhayan ang maliliit na negosyante. Subalit matapos umani ng matinding batikos online, agad ding inalis ng DTI ang naturang anunsiyo mula sa kanilang opisyal na Facebook page.
Mariing tinutulan ng Philippine Pharmacists Association (PPhA) ang naturang mungkahi, na tinawag nilang banta sa kalusugan ng publiko at paglabag sa mga umiiral na batas gaya ng Philippine Pharmacy Act (Republic Act No.5921) na naamyendahan ng R.A. No. 10918 at Special Law on Counterfeit Drugs (R.A. No. 8203).
Ayon kay PPhA president Aleth Therese Dacanay, “Ang mga gamot ay hindi ordinaryong produkto at nararapat lamang na ang pagbebenta nito ay nasa ilalim ng pangangasiwa ng lisensyadong mga propesyonal.”
Binanggit din ng grupo na ang mga sari-sari store ay kadalasang walang tamang pasilidad sa pag-iimbak ng gamot, na maaaring magresulta sa pagbebenta ng expired o pekeng gamot. Noon ngang 2022, iniulat ng Food and Drug Administration (FDA) ang 185 insidente ng iligal na pagbebenta ng gamot sa mga sari-sari store sa loob lamang ng isang buwan.
Nagpahayag din ng pagkabahala ang Drugstores Association of the Philippines, na nanindigang dapat ay may sapat na regulasyon at pharmaceutical oversight kahit pa OTC drugs lang ang ibinebenta.
Sa ngayon, wala pang opisyal na pahayag ang Department of Health (DOH) at FDA ukol sa usapin.
Paglilinaw naman ng DTI, wala pang pinal na desisyon sa panukala at tiniyak na daraan ito sa masusing konsultasyon kasama ang mga eksperto at stakeholder bago ipatupad.
