MANILA, Philippines – KATANGGAP- TANGGAP ang planong pagbibitiw ni Rep. Ferdinand Martin Romualdez bilang House Speaker kung ito’y naglalayon na iligtas ang integridad ng Kongreso.
Iyon nga lamang, hindi naman makumpirma o maitanggi ni Presidential Communications Office Undersecretary at Palace Press Officer Claire Castro sa press briefing sa Malakanyang ang napaulat na pagbibitiw ni Romualdez bilang House Speaker ngayong araw.
“If Speaker Romualdez were to resign and it was for the sake of free investigation, especially since his name was mentioned, it would be fine and acceptable if his reason was to save the integrity of the institution and for free investigation,” ang sinabi ni Castro.
Tinuran pa ni Castro na ang pagbibitiw ni Romualdez bilang House Speaker ay hindi magiging isang avenue para sa mambabatas para makatakas sa pananagutan kapag napatunayan na sangkot siya sa mga usapin na ibinabato sa kanya.
Nauna rito, kinumpirma ni Castro na nagpulong sina Pangulong Marcos Jr. at Rep. Romualdez sa Palasyo ng Malakanyang, Martes ng gabi, Setyembre 17 sa gitna ng kontrobersya ng maanomalyang flood control projects sa bansa.
Iyon nga lamang, hindi naman masabi ni Presidential Communications Office Undersecretary at Palace Press Officer Claire Castro sa press briefing sa Malakanyang kung ano ang napag-usapan ng mga ito. Kris Jose
