PORMAL nang binuksan ang Philippine Water Week 2026 sa pamamagitan ng isang Water and Gender Exhibit na ginanap sa Central Office ng Department of Environment and Natural Resources (DENR) nitong Marso 9, 2026.
Pinangunahan ng bagong hirang na DENR Secretary Juan Miguel T. Cuna, CESO I, ang nasabing kick-off event, kasama si NWRB Executive Director Dr. Sevillo D. David, Jr. sa ribbon-cutting ceremony upang pormal na buksan ang exhibit area. Itinampok dito ang mga booth mula sa iba’t ibang institusyon sa sektor ng tubig, mga katuwang na ahensya ng DENR, at mga partner organization
Tampok na Inisyatibo ng NWRB
Sa booth ng National Water Resources Board (NWRB), binigyang-diin ang mga pangunahing programa ng ahensya sa pagbuo ng mga polisiya, regulasyon, at pagpapatupad ng mga batas sa tubig. Ipinakita rin sa publiko ang mahalagang papel ng kapwa kababaihan at kalalakihan sa pamamahala ng ating likas-yaman.
Nagkaroon din ng mga trivia games kung saan natutunan ng mga bisita ang mahahalagang impormasyon, gaya ng:
– Ang lahat ng anyong tubig sa Pilipinas ay pag-aari ng Estado.
– Ang pagkakaiba at kahalagahan ng surface water at groundwater.
– Ang mga hamon na kinakaharap ng mga kababaihan at batang babae sa pagkuha ng malinis na tubig.
Teknolohiya at Konserbasyon
Ipinamalas din sa exhibit ang mga makabagong kagamitan gaya ng portable desalination equipment (panggawa ng inuming tubig mula sa tubig-dagat) at ang paglulunsad ng Groundwater Atlas of the Philippines Second Edition (2025) ng Mines and Geosciences Bureau (MGB).
Nakilahok din ang mga malalaking kompanya gaya ng MWSS, Maynilad, at Manila Water upang isulong ang mga programa sa pagtitipid ng tubig.
Ang pagdiriwang ngayong taon ay may temang pandaigdig na Water and Gender, na binigyang-diin sa lokal na tagline na: “Isang Agos para sa Karapatan at Pagkakapantay- pantay.”
Layon nito na paigtingin ang kamalayan ng publiko sa wastong pamamahala at konserbasyon ng tubig habang isinusulong ang pantay na karapatan para sa lahat.
